Saıasat • 28 Sáýir, 2020

Qosshysyna basshysy jaýapty

8 retkórsetildi

Prezıdent Qasym-Jomart Toqaev memleket saıasatyndaǵy basymdyq berilgen baǵyttyń biri retinde azamattardyń quqyǵyn qorǵaýdy atap kórsetken edi. Munyń mánisi mynada: eger qaramaǵyndaǵy qyzmetker jaza basyp, sybaılas jemqorlyq sıpaty bar zańbuzýshylyqqa barar bolsa, onda taıaqtyń ekinshi ushy mindetti túrde onyń tikeleı basshysyna tııýi kerek. Iаǵnı ol qaramaǵyndaǵy qyzmetkermen birge zań aldynda jaýapkershilikke tartylýy tıis. Bir sózben aıtqanda, qyzmetten qýylady.

Qazirgi tańda basshylyq quramǵa arnalǵan bul qatań talaptyń oryndalýy ár-ár jerden kórinis ta­ýyp jatyr. Máselen, Qaraǵandy oblysyndaǵy Sátbaev qalasynda jergilikti turǵyn úı-kommýnaldyq sharýashylyq bóliminiń bastyǵy jyl basynda Qylmystyq ko­deks­tiń eki birdeı babymen jaýap­kershilikke tartylǵan edi. Naqtyraq aıtqanda, basshylyq qyzmette bolǵan burynǵy laýazymdy tulǵa ulynyń fırmasy oryndamaǵan jumystyń aktisine qol qoıyp, sybaılastyq jemqorlyq sıpaty bar qylmysqa jol bergen edi.

Osy jyldyń basynda Sátbaev qalalyq sotynyń úkimine saı turǵyn úı-kommýnaldyq sharýa­shylyq, jolaýshylar kóligi jáne avto­mobıl joldary bóliminiń burynǵy bastyǵy kináli bolyp tanylǵan-tuǵyn.

Mine, qol astyndaǵy qyzmetshisi osyndaı zańbuzýshylyqqa baryp, abyroıdy aırandaı tókken kezde Sátbaev qalasynyń ákimi Asqar Ydyrysov otstavka surap oblys ákimi Jeńis Qasymbektiń atyna ótinish jazǵan bolatyn. О́ńir basshysy qala ákimin qyzmetten bosatpady. Biraq jazasyz da qaldyrmady.

Jalpy, «Memlekettik qyzmet týraly» Zańǵa 2019 jyldyń 10 jeltoqsanynda engizilgen óz­geristerge saı, qol astyndaǵy qyz­metkeri sybaılas jemqorlyq qylmysyna barǵan saıası qyzmetshi otstavkaǵa ketýi tıis. Jasyratyny joq, Qaraǵandy oblysynda bolǵan bul is kezinde ájeptáýir áńgimeniń, pikirtalastyń týyndaýyna sebepshi boldy. Bul týraly óńirlik kommýnıkasııalar qyzmetinde arnaıy brıfıng te uıymdastyrylǵan. Sol brıfıngte Qaraǵandy oblystyq Memlekettik qyzmet is­te­ri jónindegi departamenttiń basshysy Aıgúl Baıhanova osy jaǵ­daıdy mysalǵa ala otyryp, zańǵa engizilgen ózgerister týraly egjeı-tegjeıli túsindirip bergen edi. «Jalpy, otstavkany qabyldaý nemese qabyldamaý – tıisti ókiletti laýazymdy tulǵanyń quqyǵyndaǵy sharýa. Otstavka máselesi bir aı ýaqyttyń ishinde qaralady. Ol qabyldanbaǵan jaǵdaıda, memlekettik qyzmetshi óziniń laýazymdyq ókilettikterin atqara berýi tıis», dep atap ótti ol.

Álbette, basshynyń jaýapker­shiligin tarazylaý barysynda, tekserý kezinde qaramaǵyndaǵy qyzmetker jasaǵan sybaılas jem­qorlyq qylmys pen onyń quqyqbuzýshylyqty aldyn ala es­kertý boıynsha laýa­zym­dyq mindetterin durys oryn­dama­­ǵandyǵynyń arasyndaǵy baı­lanystyń bar-joǵyna erekshe ma­ńyz beriledi.

Jalpy, joǵaryda aıtylǵan zańǵa engizilgen ózgerister jaıynda qoǵamdyq pikirdiń qoldaýshylyq baǵytta bolǵanyn aıtqan jón.

 

Qaraǵandy oblysy

 

Sońǵy jańalyqtar

ForteBank: Bir dollar – 388 teńge

Qazaqstan • Búgin, 15:35

Áke rýhynan qýat alǵan qaısar jan

Rýhanııat • Búgin, 11:54

Uqsas jańalyqtar