Qazaqstan • 29 Sáýir, 2020

Tótenshe jaǵdaı kezinde merzimi ótken qujatty paıdalanýǵa bolady

21 retkórsetildi

Parlament Májilisiniń Spıkeri Nurlan Nyǵmatýlınniń tóraǵalyǵymen ótken Palatanyń jalpy otyrysynda depýtattar tótenshe jaǵdaı kezeńinde áleýmettik-ekomıkalyq turaqtylyqty qamtamasyz etýge baǵyttalǵan zań jobasyn maquldady.

Zań jobasyn talqylaý barysynda depýtat Shavhat О́temisov tótenshe jaǵdaı kezinde azamattar jaramdylyq merzimi ótken qujattaryn jańarta almaıtynyn aıtyp, baıandamashydan bul jaıdyń retin surady. Sóziniń dáleli retinde qazirgi qysyltaıań shaqta 99,5 myń jeke kýáliktiń, 68 myń júrgizýshi kýáliginiń merzimi ótip ketkenin alǵa tartty.

Zań jobasyn tanystyrǵan Ulttyq ekonomıka mınıstri Rýslan Dálenov bul másele boıynsha qazir Ishki ister mınıstrligi óz quzyreti aıasynda qaýly jobasyn ázirlep jatqany, tótenshe jaǵdaı rejımi kezinde jaramdylyq merzimi ótken qujattardy azamattarymyzǵa paıdalaný quqyǵy beriletinin aıtyp, jaýap berdi.

Bul sózdi zalda otyrǵan Ishki ister mınıstriniń orynbasary Iýrıı Ilın quptap, mınıstrdiń buıryǵymen kólik júrgizýge ruqsat beretin qujatynyń merzimi ótip ketken azamattardy ákimshilik jaýapkershilikke tartpaý týraly tapsyrma berilgenin atap ótti. Al jeke kýálik boıynsha Memleket basshysynyń atyna usynys ázirlenipti. Bul tótenshe jaǵdaı rejımi kezeńinde osy normany Prezıdent Jarlyǵymen uzartý úshin qajet.

Jalpy mundaı qujattar tizimi óte kóp eken. Mamyr aıynda taǵy 90 myńdaı jeke kýáliktiń jaramdylyq merzimi bitpek.

Májilis tóraǵasy Nurlan Nyǵmatýlın tótenshe jaǵdaı rejımi engizilgen jaǵdaıda adamdar merzimi ótken qujattaryn paıdalanýǵa múmkindik beretin mundaı normanyń qajet ekenin basa aıtty.

Sońǵy jańalyqtar

Jigittiń jaqsysy

Rýhanııat • Keshe

Uqsas jańalyqtar