Aımaqtar • 29 Sáýir, 2020

Qyzdar ýnıversıteti: «Ashyq esik kúninde» 3 myńǵa jýyq saýal qoıyldy

83 retkórsetildi

Búgin Qazaq ulttyq qyzdar pedagogıkalyq ýnıversıtetinde respýblıkalyq «Ashyq esik kúni» ótti. Onlaın formatta oqý ornynyń YouTube-taǵy resmı arnasynda uıymdastyrylǵan shara barysynda jalpy sany 3 myńǵa jýyq saýal qoıyldy, dep habarlaıdy ýnıversıtettiń baspasóz qyzmetiniń jetekshisi Jandar Asan.

Aıta keteıik, onlaın formattaǵy «Ashyq esik kúni» elimizdiń joǵary oqý oryndarynyń arasynda alǵashqylardyń biri bolyp Qazaq ulttyq qyzdar pedagogıkalyq ýnıversıtetinde uıymdastyryldy.

Onyń málimetinshe, suraqtardyń deni bıylǵy mektep bitirýshiler men olardyń ata-analary jáne bilim berý salasynyń qyzmetkerleri tarapynan túsken. Tórt saǵattan astam ýaqytqa sozylǵan «Ashyq esik kúnin» oqý ornynyń rektory Gaýhar Aldambergenovanyń alǵy sózimen ashyldy.

– Barshańyzǵa belgili, Qyzdar ýnıversıteti – elimizdegi birden-bir tek qyzdar oqıtyn joǵary oqý orny. Orta Azııa aımaǵynda mundaı ýnıversıtet joq. Álemde de saýsaqpen sanarlyqtaı. Zańǵar jazýshy Muhtar Áýezov: «Táńir jazsa, bul ınstıtýt bolashaq qazaq qyzdarynyń shamshyraǵyna aınalady. Osy shamshyraqtyń jaryq sáýlesi sónbesin deıik» degen paıymy 75 jyldan astam tarıhy bar ýnıversıtettiń ózindik ereksheligi men mańyzyn aıǵaqtap turǵandaı, – dedi óz sózinde Gaýhar Aldambergenova.

Oqý ornynyń basshysy biregeı bilim uıasynyń basty baǵdary týrasynda da baıandady.

– Qazaqtyń «Ultyńdy tárbıeleımin deseń – qyzyńdy tárbıele» degen dana sóziniń astarynda úlken mán-maǵyna jatyr. Qyz – bolashaq ana, qyz –otbasynyń uıytqysy, qyz – asyl jar. Búginde urpaq tárbıeshisi retinde sanalatyn bolashaq muǵalimderdi daıarlaý barysynda bizdiń ujym ǵulama ǵalym ál-Farabıdiń: «Tárbıesiz berilgen bilim – adamzattyń qas jaýy» degen ulaǵatty paıymyn basty ustanym retinde paıdalanady, – dep atap ótti Qyzdar ýnıversıtetiniń rektory.

Sondaı-aq ol mektep bitirýshi túlekterdi parasat mektebine aınalǵan oqý ornynda bilim alýǵa shaqyrdy.

– Qymbatty jastar! Biz, Qazaqstannyń bolashaǵyn daıyndap jatqanymyzdy nyq senimmen aıta alamyz. Sebebi bizdiń túlekterimizdiń kópshiligi Qazaqstan qoǵamynyń aldyńǵy qatarynda eńbek etip, elimizdiń damýy jolynda qyzmet atqarýda. Bul – ujym eńbeginiń nátıjesi, biz ony maqtan etemiz jáne bolashaqqa úlken úmitpen qaraımyz. Qadirmendi bilim qýǵan armanshyl jastar! Sizderdi ulaǵat uıasyna aınalǵan qarashańyraq – Qyzdar ýnıversıtetinde bilim alýǵa shaqyramyz, – dep sózin qorytyndylady Gaýhar Aldambergenova.

Shara barysynda fakýltet dekandary men qurylymdyq bólim basshylary oqý orny men ondaǵy mamandyqtar týraly keńinen málimet berip, kópshilik tarapynan qoıylǵan saýaldarǵa egjeı-tegjeıli jaýap berdi.

Sonymen qatar «Ashyq esik kúni» aıasynda bilim ordasynyń tanymal túlekteri men sheteldik seriktes joǵary oqý oryndarynyń ókilderi beıne úndeýler serııasyn usyndy. Al Halyqaralyq yntymaqtastyq bóliminiń basshysy Raıa Ámirjanova qosdıplomdy bilim berý baǵdarlamasy jaıly málimet berse, Qazaqstan tarıhy kafedrasynyń aǵa oqytýshysy Berik Jubanyshev «Qazaqstan tarıhy» páninen sheberlik sabaq ótkizdi. Sondaı-aq «Jan shýaǵy» psıhologııalyq ortalyǵynyń dırektory Kúlmash Elshibaeva talapkerlerge psıhologııalyq keńes berdi.

Búginde oqý orny memlekettik lısenzııa negizinde 49 bakalavrıat, 28  magıstratýra,  12 PhD doktorantýra mamandaryn  daıarlaıdy. Stýdentterge bilim berý traektorııasyn tańdaý men bilim berý qyzmetteriniń keń spektri usynylǵan.

Ýnıversıtettiń materıaldyq-tehnıkalyq bazasynda 3 oqý korpýsy, 7 stýdenttik jataqhana, memlekettik bilim berý grantyna túsken stýdentter úshin 3 mezgil tamaqpen qamtamasyz etetin «Ulpan» ashanasy, stýdentter úshin ashylǵan «Aqqý» júzý basseıni jáne zamanaýı Ǵylymı kitaphana bar.

 

ALMATY

Sońǵy jańalyqtar

Jigittiń jaqsysy

Rýhanııat • Keshe

Uqsas jańalyqtar