Keshe Astanada Munaı-gaz kesheni qyzmetkerleriniń salalyq kásipodaǵy respýblıkalyq birlestiginiń quryltaıy bolyp ótti. Oǵan «QazMunaıGaz» UK» AQ-tyń munaı-gaz barlaýmen, óndirýmen, tasymaldaýmen, qaıta óńdeýmen, sondaı-aq servıs sektorynda qyzmet etetin kompanııalar toptarynyń birlesken kásipodaq uıymdarynyń ókilderi qatysty.
Elordadaǵy quryltaıǵa «QazMunaıGaz» UK» AQ-tyń enshiles kásiporyndaryndaǵy barlyq kásipodaq uıymdarynyń jetekshileri jáne respýblıkanyń túrli aımaqtaryndaǵy óndiris bólimsheleriniń basshylary keldi.
Keshe Astanada Munaı-gaz kesheni qyzmetkerleriniń salalyq kásipodaǵy respýblıkalyq birlestiginiń quryltaıy bolyp ótti. Oǵan «QazMunaıGaz» UK» AQ-tyń munaı-gaz barlaýmen, óndirýmen, tasymaldaýmen, qaıta óńdeýmen, sondaı-aq servıs sektorynda qyzmet etetin kompanııalar toptarynyń birlesken kásipodaq uıymdarynyń ókilderi qatysty.
Elordadaǵy quryltaıǵa «QazMunaıGaz» UK» AQ-tyń enshiles kásiporyndaryndaǵy barlyq kásipodaq uıymdarynyń jetekshileri jáne respýblıkanyń túrli aımaqtaryndaǵy óndiris bólimsheleriniń basshylary keldi.Quryltaı qatysýshylary qoǵamdyq birlestiktiń jarǵysyn bekitip, óz tóraǵasyn saılady. Oǵan qosa, ortalyq keńes pen baqylaý-tekserý komıssııasyn da anyqtady. Sóıtip, baqylaý-tekserý komıssııasynyń jaǵdaıyn naqtylap, fılıaldar men bastaýysh uıymdardyń, múshelik jarna tóleý máselelerin talqylady. Bularmen qatar, Astana men Almaty qalalarynyń jáne 10 oblystyq fılıaldardyń salalyq kásipodaq uıymynyń qurylymyn bekitti.
Munaı-gaz kesheni qyzmetkerleri salalyq kásipodaǵynyń tóraǵasy bolyp «QazMunaıGaz» UK» AQ Áleýmettik saıasat jáne qoǵammen baılanys departamenti dırektorynyń orynbasary Sultan Qalıev saılandy. Júz myńnan astam adam eńbek etetin ulttyq kompanııanyń kásipodaǵyna tóraǵa bolyp saılanǵan Sultan Esimuly áriptesteri aldynda uıymnyń keleshek mindetteri men qyzmeti týraly baıandady. Jarǵynyń mán-jaıyn túsindirip, keıbir tustaryn qaıta talqylaýǵa saldy.
– Qurmetti áriptester! Sizderdi búgingi munaı-gaz kesheni qyzmetkerleri kásipodaǵy quryltaıynyń ashylýymen shyn júrekten quttyqtaýǵa ruqsat etińizder! Shynynda da, búgin biz erekshe oqıǵanyń kýágeri bolyp otyrmyz. Ata-babalarymyzdan qalǵan tamasha sóz bar. «Úı ústine úı tikseń, onan da jyly bolady» deıdi. Iá, osy jıynǵa qatysyp otyrǵan sizder qyzmetkerler men jumysshylardyń áleýmettik múddesin qorǵaıtyn bir-bir kásipodaq uıymyn basqaryp kelesizder. Osy jolda tabandylyq tanytyp, áleýmettik máselelerdiń oń sheshimin tabýyna keńinen jol ashyp júrgenderińiz belgili. Alaıda, jeke-jeke júrip jol tabý – bir basqa. Birge júrip, bir jaǵadan – bas, bir jeńnen – qol shyǵarǵan – bir basqa. Sondyqtan da, atalarymyz aıtyp ketken ataly sózdiń máni men mańyzy búgin de mańyzdy ekenin bilesizder, – dep bastady sózin qoǵamdyq jańa uıymnyń tóraǵasy.
Qazirgi tańda «áleýmettik seriktestik» degen uǵym qoǵamymyzǵa myqtap ornyqqan. Ýaqyt ozǵan saıyn bul uǵymnyń mańyzy arta túsýde. О́ıtkeni, áleýmettik jaýapkershilikti áleýmettik seriktestiksiz sheshý barǵan saıyn qıyndap jatqanyn ómirdiń ózi dáleldep otyr. Sondyqtan, salada týyndaıtyn jumysshy men jumys berýshiniń arasyndaǵy kez kelgen máseleni áleýmettik seriktestikpen birge otyryp sheshken óte tıimdi.
Quryltaı qatysýshylary, kásipodaq uıymdarynyń qyzmetin burynǵydan álde qaıta jetildirip, jańa baǵytta jumys isteý týraly óz pikirlerin ortaǵa saldy. Jarǵydaǵy keıbir tarmaqtardy qaıyra pysyqtap, qaǵıdattyń eki túrli túsinik beretin tustaryn anyqtap, naqtylady. Músheliktegi jumysshylardyń jarna tóleý tártibi de pikir-talasqa arqaý boldy. Salanyń bolashaq mamany bolatyn stýdentter de nazardan tys qalmapty. Eger olar Munaı-gaz kesheni qyzmetkerleriniń salalyq kásipodaǵyna múshe bolýǵa ótinish bildirse, qalaýy qabyl alynady. Sondaı-aq, sala qyzmetinen zeınetke shyqqan ardagerler múshelikte qalyp, uıymnyń jumysyna atsalysýǵa quqyly bolmaq.
Búgingi kúnde, kásipodaq uıymdary burynǵydaı kompanııa basshylyǵyna qolyn jaıǵan baǵynyshty emes, kerisinshe jumys berýshimen teń dárejeli áriptes ekenin únemi jadymyzdan shyǵarmaıyq, dedi bir sózinde Sultan Esimuly. Rasynda qazirgi kezde kóptegen áleýmettik shıelenisterdi sheshý úshin kásipodaq uıy mdarynyń qyzmetin kúsheıtý ýaqyt talaby bolyp tur. Sondyqtan Memleket basshysy kásipodaqtardy zaman talabyna saı qaıta quryp, kerek bolsa ol týraly jańa zań daıyndaýdy tapsyrǵany da belgili. Munaı-gaz salasyndaǵy birqatar kompanııalardaǵy kásipodaq uıymdary osy quryltaıda birige otyryp, jalpy respýblıkalyq kásipodaq federasııasyna qosylatyny aıtyldy.
Bir ortalyqqa uıysqan uıymdar ortalyq keńes músheligine 25 adamdy saılady. Olardyń barlyǵy derlik, aımaqtardaǵy fılıaldardyń basshylary. Ortalyq keńeske basshylar men jumysshylardyń arasynda abyroı-bedeli asa joǵary, bilim-biligi shyńdalǵan adamdar saılanady. Al endi, oryn alǵan áleýmettik shıelenisterdi negizinen jergilikti fılıaldar sheship otyratyn bolǵandyqtan, ortalyq keńestiń músheligi osylaı jasaqtaldy, dedi tóraǵa. Onyń pikirin quryltaı qatysýshylary biraýyzdan qoldady. Sondaı-aq, aımaqtardaǵy basshylar jyl saıyn atqarylǵan jumystar týraly qyzmetkerler aldynda esep berip otyratyn boldy. Al olardyń qyzmetine jarǵy boıynsha bes jylda bir ret baǵa berilip, qaıta saılaý ótkiziledi.
«Bir bastan eki bas artyq» ekenin qundylyqtar qunsyzdanyp jatqan qıyn kezeńde jaqsy túsinemiz. Sondyqtan da, búgingi quryltaıymyzda birigý týraly oılarymyzdy ortaǵa salyp, túpki maqsatymyzǵa jetýdiń joldaryn jan-jaqty qarastyryp otyrmyz. Bul osy jıynda bekigen jarǵy osy kúıinde qatyp qalady degendi bildirmeıdi. Buıyrtsa, jumys barysynda qazirgi bekitken jarǵymyz áli talaı jetildirilip, pysyqtalýy yqtımal. О́ıtkeni, bizdiń elimizde áleýmettik-ekonomıkalyq saıasatty óte ıkemdi etip paıdalanýdy Elbasymyz únemi aıtyp otyrady. Biz sol talaptardyń údesinen shyǵyp, kez kelgen áleýmettik shıelenistiń, keıbir túsinispeýshilikterdiń únemi aldyn alyp otyrýǵa qyzmet etýimiz kerek, dedi S.Qalıev.
Qazaqstannyń Munaı-gaz kesheni – eldiń ekonomıkasyn alǵa súıreýshi lokomotıv ekenin Elbasymyz Nursultan Nazarbaev árkez eske salyp keledi. 100 myńnan astam adamdy eńbekpen biriktirip otyrǵan salanyń áleýmettik qorǵalýy – óte aýyr jumys. Osy oraıda, jekelegen kásipodaqtardyń osyǵan deıin atqaryp kelgen ulan-ǵaıyr jumystaryn joqqa shyǵarýdan aýlaqpyz. Biraq ár zamannyń óz talaby bolady. Ol búgin bizge bas biriktirýdi meńzeıdi. Barǵan saıyn kúrdelene túsetin ómirimizdiń barlyq túıtkildi máselelerin kóp bolyp sheshe alatynymyz belgili. Sondyqtan da, birikken kásipodaq qurý máselesi dál óz ýaqytynda kóterildi, dep jalǵady óz sózin birikken kásipodaq tóraǵasy.
Aıtýyna qaraǵanda, bólek-bólek kásipodaqtardyń basyn biriktirý sharasy 5-6 jyl buryn bastalyp, búgin júzege asqan kúni eken. Eger saladaǵy 70-80 myń jumysshy-qyzmetkerler uıymǵa múshelikke ótse, onda «Qazaqstan temir joly» UK» AQ-tyń kásipodaǵy sııaqty kompanııa basshylyǵyna qol jaımaı-aq, ózderi ózderin qarjymen de qamtamasyz ete alady eken.
Toqsan aýyz sózdiń tobyqtaı túıini, jańa qurylǵan respýblıkalyq qoǵamdyq uıym kesheli-búgin resmı tirkelý úshin tıisti memlekettik organǵa ótinish túsirdi. Tirkeý sátti ótken soń, arnaıy josparlar men baǵdarlamalar daıyndalyp, olardy júzege asyrý sharalary qarastyrylmaq. S.Qalıev ol úshin de Astanada arnaıy jıyn bolatynyn aıtty.
Nurbaı ELMURATOV,
«Egemen Qazaqstan».
Sýretti túsirgen
Erlan OMAROV.
