Jalpy alǵanda óńirde tirkelgen 146 naýqastyń 119-y – syrttan, negizinen Reseı Federasııasynan kelgen eken. 26 naýqas aýrý adammen qarym-qatynasta bolyp, indet juqtyrǵan. Batys Qazaqstan oblystyq taýarlar men kórsetiletin qyzmetterdiń sapasy men qaýipsizdigin baqylaý departamenti basshysy Muhamǵalı Aryspaev taǵy bir naýqastyń dertti qaıdan juqtyrǵany anyqtalmaı jatqanyn aıtty.
- Qazir aýrýhanada jatqan naýqastardyń 80 paıyzynda aýrý jeńil ótýde, qalǵan 20 paıyzynyń jaǵdaıy ortasha. Qatty asqynǵan túri joq. 6 naýqastyń boıynan pnevmonııa tabyldy, biraq olardyń tynys alýynda asqyný joq. Bir baıqaǵanymyz, koronavırýs derti óte aldamshy, bastapqy kezeńi jótelsiz, qyzýsyz ótedi. Kúdikti adamdardy der kezinde tekserip, aýrýdy erte anyqtaǵannyń arqasynda asqynýǵa jibermeı otyrmyz, - dedi Batys Qazaqstan oblystyq densaýlyq saqtaý basqarmasynyń basshysy Bolatbek Qaıýpov.
Budan buryn habarlanǵandaı, «COVID-19» ınfeksııasyn sol indetpen kúresip júrgen batysqazaqstandyq medısına qyzmetkerleri de juqtyrǵan oqıǵalar kezdesti. Qazir olardyń sany 10-ǵa jetken. Indetke qarsy maıdannyń alǵy shebinde júrgen aq jeleńdi abzal jandardyń jaǵdaıy qalaı?
- Koronavırýs indetine baılanysty qurylǵan karantındik stasıonarda jáne naýqastar emdelip jatqan ınfeksııalyq aýrýhanada jumys istep júrgen áriptesterimiz arnaıy jataqhanada, qonaqúıde turyp jatqanyna biraz boldy. Olar tótenshe jaǵdaı rejimine sáıkes, óz úılerine barmaıdy. Biz olardyń densaýlyǵyn eki aptada bir márte tolyq skrınıngtik zertteýden ótkizip otyrmyz. Qazir anyqtalǵan oqıǵalar – sol tekserýdiń nátıjesi. Osylaısha aýrýdy asqyndyrmaı, erte anyqtadyq. Qazir olardyń bári oblystyq juqpaly aýrýlar aýrýhanasyna jatqyzyldy. Olarmen qarym-qatynasta bolǵan 11 adam karantındik stasıonarǵa oqshaýlandy, - deıdi Muhamǵalı Aryspaev.
- Osy oqıǵanyń ózi «COVID-19» ınfeksııasynyń óte qaýipti ekendigin kórsetip tur. Dárigerler barynsha saqtyq sharalaryn jasaǵannyń ózinde vırýs juqtyryp otyr. Eger elimizde, oblysymyzda osyndaı tótenshe jaǵdaı, karantındik sharalar jasalmasa, taralǵan derttiń aýqymy basqasha bolar edi. Erte baıqap, jedel emdegenniń nátıjesinde der kezinde asqyndyrmaı toqtatyp jatyrmyz. Bul óte qaýipti indet! Dárigerlerdiń jumysynyń qadirin bilińizder. Saqtyq sharalaryn umytpańyzdar, jeke gıgıenany saqtańyzdar. Memleket qolǵa alǵan sharalardyń bári halyqtyń densaýlyǵy úshin jasalyp otyr, - dedi Bolatbek Amangeldiuly.
Aıta keteıik, búginde Batys Qazaqstan oblystyq juqpaly aýrýlar aýrýhanasynda - 137 adam, provızorlyq stasıonarda - 31, karantındik stasıonarda - 85, úı oqshaýlaýynda - 1958 adam dárigerler baqylaýynda. 9 adam koronavırýstyq juqpadan jazylyp shyqty.
