Aımaqtar • 30 Sáýir, 2020

Atyraý: 56 eldi mekende qatty jol jabyny joq

219 retkórsetildi

Munaıly óńirde  jaqsy  joldyń úlesi áli de az. О́ńirdiń 56 eldi mekeninde qatty jol jabyny joq. Bul týraly oblys ákimi Mahambet Dosmuhambetovtiń tóraǵalyǵymen ótken  kólik ınfraqurylymyn damytý máselesi jónindegi selektorlyq keńeste belgili boldy.

Jolaýshylar kóligi jáne avtokólik joldary basqarmasynyń basshysy Áset Orazǵalıevtiń aıtýynsha, oblystaǵy joldyń jalpy uzyndyǵy 3000 km-den asady. Onyń ishinde 1120 km jol respýblıkalyq mańyzǵa ıe bolsa, jergilikti baǵynysqa 1927 km jol qaraıdy.  Byltyr  kólik ınfraqurylymyn damytýǵa  39,2 mlrd teńge bólindi. Bul qarajatqa 37 eldi mekendegi  230 km jol qurylysy júrgizildi.

«Nurly jol» baǵdarlamasyndaǵy  mańyzdy joba –  «Atyraý-Astrahan» halyqaralyq avtokólik jolyn qalpyna keltirý. Alaıda, búgingi ekonomıkalyq jaǵdaı biraz ózgeriske sebep bolyp otyr.

– Qazir jaǵdaı ózgerdi. Jobalardy júzege asyrýǵa qarjy jetispeýshiligi baıqalady. Sondyqtan, aldymen basty mindetterge, aýdandardyń qajettiligine, joldyń jaǵdaıyna qaraý kerek. Osyndaı qajettilikke baılanysty jospar jasaǵan jón. Bizge kólik ınfraqurylymyn damytý qajet. Biraq, naqty merzimi men basty baǵyttar kórsetilýi tıis. Bul baǵyttaǵy  jumystar josparly túrde júrgiziledi,- dedi  oblys ákimi Mahambet Dosmuhambetov.

Ákimniń pikirinshe,   jobany iske asyrýdyń barlyq mehanızmin esepke alý kerek.  Al, atqarylǵan jumystardyń sapasyna qatysty syn  aıtýǵa bolady. О́ıtkeni, keıbir jaǵdaılardan tehnologııany saqtamaý, paıdalanylǵan materıaldar men óndiristik prosesterdiń sapasyna tolyqqandy baqylaýdyń joqtyǵy baıqalady. Osyǵan oraı oblys ákimi Mahambet Dosmuhambetov atqarylǵan jumystardyń sapasy men bıýdjet  qarajatynyń maqsatty jumsalýyn qatań baqylaýǵa alýdy tapsyrdy.

– Oblystaǵy 56 eldi mekende qatty jol jabyny joq. Ásirese, bul Qurmanǵazy men Qyzylqoǵa aýdandarynda kezdesedi. Jylyoı aýdanynda – tórt, Inder aýdanynda – úsh, Maqat aýdanynda  bir eldi mekende jol jabyny joq. Bul máseleni sheshý baqylaýda bolady. Jobalaý-smetalyq qujattama daıyndalyp jatyr, - deıdi basqarma basshysy   Áset Orazǵalıev.

Qazir Atyraý oblysyndaǵy jaqsy joldyń úlesi – 57 prosent. Endi bul kórsetkishti 2025 jyly 95 prosentke jetkizý kózdelip otyr.

 

Sońǵy jańalyqtar

Jigittiń jaqsysy

Rýhanııat • Keshe

Uqsas jańalyqtar