Ekonomıka • 01 Mamyr, 2020

36 mlrd teńge jeńildetilgen nesıe beredi

34 retkórsetildi

Aýyl sharýashylyǵyn qarjylaı qoldaý qory «Eńbek» nátıjeli jumyspen qamtýdy jáne jappaı kásipkerlikti damytý baǵdarlamasy aıasynda kásipkerlerge jeńildetilgen shaǵyn nesıe berý úshin 36 mlrd teńge qarjy baǵyttaýdy josparlap otyr.

Memleket basshysy Qasym-Jomart Toqaevtyń bıyl 31 naýryzda jasaǵan málimdemesinde kásipkerlik sektordy qoldaýǵa baǵyttalǵan birqatar mindet belgilengen bolatyn. Prezıdent salyq­tyq jeńildikter, nesıeler boıynsha tólemderdi keıinge shegerý, tekserýlerge tyıym salý máselelerimen qatar, keń jáne sapaly jumyspen qamtý, agroónerkásiptik keshendi úzdiksiz qamtamasyz etý, shaǵyn jáne orta bıznesti nesıeleýdi arttyrý qajettiligin erekshe atap ótti.

Osy oraıda Aýyl sharýashylyǵyn qar­jy­laı qoldaý qory jeti jyldan beri shaǵyn kásipkerlikti qoldaýǵa baǵyttalǵan birqatar memlekettik baǵdarlamanyń qar­jylyq operatory retinde jumys istep kele jatqanyn aıta ketý kerek. Kompanııa 2017 jyldan beri 2017-2021 jyldarǵa arnalǵan «Eńbek» nátıjeli jumyspen qamtýdy jáne jappaı kásipkerlikti damytý baǵdarlamasynyń ekinshi baǵytyn iske asyrýda. Kompanııanyń baspasóz qyzmetiniń habarlaýynsha, osy aralyqta túrli baǵdarlama aıasynda qor jalpy somasy 160 mlrd teńge bolatyn 53 myńnan astam shaǵyn nesıe bergen. Nátıjesinde 53 myńnan astam aýyl turǵyny jumyspen qamtyldy.

Qor óziniń nesıe ónimderi arqyly aýyl turǵyndary men aýyl sharýashylyǵy taýaryn óndirýshilerdiń jobalaryn túrli maqsatty baǵyttar boıynsha qar­jylandyryp keledi. Naqty aıtar bol­saq, mal sharýashylyǵyn, ósimdik sharýa­shylyǵyn, aýyl kásipkerligin damytý jáne aýyl sharýashylyǵy ónimderin qaıta óńdeý men saqtaý jobalary bar.

Nátıjeli jumyspen qamtý baǵdar­la­masy boıynsha túrli maqsattaǵy ne­sıeniń jyldyq syıaqy mólsheri 6%-dy quraıdy. Sondaı-aq tıimdi jyldyq syıaqy mólsheri 6,7%-dan aspaıdy. Nesıeniń soma­sy, jeńildik merzimi nesıe ónimine baılanysty ártúrli bolady. Sondaı-aq qordyń nesıeleý shartynda agrarııler qyzmetiniń ereksheligi, onyń ishinde aýyl sharýashylyǵy jumystarynyń maýsymdylyǵy men sıkldiligi eskerilgen.

– Baǵdarlamaǵa aýyl sharýashylyǵymen jáne aýyl sharýashylyǵyna jatpaıtyn kásip túrlerimen aınalysqysy keletinder jáne kásibin keńeıtýdi josparlaǵan azamattar qatysa alady. Nesıe alýshylarǵa qoıy­latyn birqatar talap bar. Atap aıtqanda, kásibin endi bastaıtyn azamat­tyń kásipkerlik negizderin oqyǵany týra­­ly sertıfıkaty bolýy tıis. Nesıe ta­rı­hy jaqsy bolǵany abzal. Kepilge qoıa­t­yn múlki bolýy shart. Budan bólek, bıýd­­jettik jáne qarjy uıymdarynyń al­d­yn­da merzimi ótken bereshegi bolmaýy kerek, – dep habarlady kompanııanyń baspasóz qyzmeti.

Aýyl sharýashylyǵyn qarjylaı qoldaý qorynyń Soltústik Qazaqstan oblysyndaǵy fılıalynan nesıe alǵan kásip­kerlerdiń 60%-y birneshe ret jeńil­detilgen nesıe rásimdegender. Solardyń biri – «Tamyr» sharýa qojaly­ǵynyń basshysy Janǵalı Ysqaqov. Aıyrtaý aýdanynda turatyn ol mal jáne ósimdik sharýashylyǵymen aınalysady. Qojalyq basshysy 2011 jyldan beri qormen yntymaqtasa jumys istep keledi. «Eńbek» baǵdarlamasyna qatysqan fermer aýyl sharýashylyq tehnıkasyn alýǵa, egin egýge, mal basyn kóbeıtýge nesıe alǵan. Byltyr jyl sońynda aýyl sharýashylyǵy tehnıkalaryn jańadan satyp alý úshin taǵy nesıe rásimdedi. Ol qazirgi ýaqytta kóktemgi egis naýqanyna daıyndalyp jatyr. Maldaryn da tóldetip, qyzý qarbalas jumystar atqarýda.

Al Túrkistan qalasynyń turǵyny Muh­tar Saparalıev «Bıznes-Keńesshi» kýr­syn aıaqtaǵan soń óziniń bıznes-josparyn iske asyrýǵa kiristi. Onyń bıznes ıdeıa­sy – qurylys salasynda qyzmet kórsetý. Muhtar kásibin bastaý úshin bergen ótinimi maquldanyp, Aýyl sharýashylyǵyn qarjylaı qoldaý qorynan 9 mln teńge nesıeni 6% mólsherlememen aldy. Nesıe qar­jysyna «LGZT 939» markaly fron­tal­dy júk tıegish tehnıka satyp alyp, iske kirisip ketti.

Jalpy, óz isin bastaýǵa nıetti adam­dar­ǵa, nesıe alǵannan keıin basqa da má­se­leleri týyndaǵan adamdarǵa kompanııa qoldaý kórsetýge daıyn. Bul úshin ár oblys­taǵy fılıaldyń menedjerlerine ha­bar­lasýǵa bolady. Kásipkerler palata­sy­nyń aýdandyq fılıaldary da keńes berýge ázir.

«Aýyl sharýashylyǵyn qarjylaı qoldaý qory» AQ – «QazAgro» Ulttyq bas­qarýshy holdınginiń quramyna kiretin mamandandyrylǵan qarjy-nesıelik uıym ekenin aıta keteıik. Qordyń negizgi mindeti – agroónerkásip kesheni salasyndaǵy basymdyqqa ıe salalar boıynsha aýyl kásipkerligin qarjylandyrý.

 

Erlik SAPABEK

 

Sońǵy jańalyqtar

Jigittiń jaqsysy

Rýhanııat • Keshe

Uqsas jańalyqtar