Oqýshylardy qashyqtan oqytýǵa tehnıkalyq múmkindik bar jáne ınternettiń jyldamdyǵy da jetkilikti mekemeler túgelge jýyq qatysyp otyr. Qashyqtan oqytý tehnologııasy oqýshylarǵa oqýdy bilim ordasyna qatynamaı-aq, alystan jalǵastyrýǵa múmkindik beredi. Mektep ákimshiligi tarapynan onlaın-formattaǵy sabaqtar, ınteraktıvti derbes tapsyrmalar jáne qosymsha ádebıetter tizimin, oqýshylardy baǵalaý sııaqty keri baılanystardy qamtamasyz etý úshin muǵalimdermen semınar-trenıngter jıi ótkiziledi.
Oqýshylarymmen búgingi tańda qashyqtan oqytý baǵdarynda – «El Arna» telearnasy, Bilimland, Kundelik.kz, WhatsApp, Zoom platformalarynyń kómegimen kúndelikti sabaǵymdy zerdelep, sol arqyly baılanys ornatyp júrmin. WhatsApp, Zoom qosymshalary kompıýter jáne uıaly telefonmen de kirýge qolaıly. Oqýshylarǵa tapsyrmalardy beınematerıal, prezentasııa, test jumysy jáne aýdıo-jazbalar túrinde oqytýdy uıymdastyryp júrmin. 6-synypta «Abaı – lırık aqyn» atty sabaǵymyz onlaın formatta ótti. Bilimland platformasynan Abaıdyń ómiri, shyǵarmashylyǵy jaıly aqparatty tyńdady. Tyńdalǵan tapsyrmadan keıin oqýshylar óz túsingenderin ortaǵa salady. Abaıdyń tabıǵat lırıkasyna arnalǵan óleńderin ǵalamtordan taýyp, dıagrammany tolyqtyrý tapsyrmasy joǵary deńgeıde oryndaldy. Oqýshylar tabıǵat lırıkasyna arnalǵan óleńderimen qosa, ánderiniń ataýy jaıly maǵlumat aldy. «Oıyńdy jetkiz» ádisimen jyl mezgilderi týraly maqal-mátelderdiń jalǵasyn taýyp, 6 «A» – synybynda Andreı Kondratov, 6 «B» – synybynda Amıra Nurbaeva, 6 «V» – synybynda Muhtar Altaı atty oqýshylarym sabaqta maqaldyń maǵynasyn ashyp, orys tilindegi balamasymen salystyryp, utymdy jaýaptar berdi. Zoom platformasy sabaqta oqýshylarmen juptyq, ujymdyq jumystar jasaýǵa óte qolaıly eken. Sebebi, munda oqýshylar arasyndaǵy dıalogtyq oqytý iske asady jáne bilmegenderin ózara talqylap, bir jaǵynan sabaqqa degen yntasy joǵarylaı túsedi, ekinshi jaǵynan oqýshylar taqyrypty jetik meńgeretinin baıqadym. Men jeke, juptyq, ujymdyq jumystyń durys júrýi úshin taqyrypqa saı durys baǵyt-baǵdar berip, tapsyrmalardy uıymdastyramyn. 5-synyptarda WhatsApp jelisiniń kómegimen ujymda M.Maqataevtyń óleńin tyńdap, óleńdi jattaýǵa, vıdeo túsirýge tapsyrma berdim. 5 «A» – synybynda Alpamys Kengespaev, Malıka Mýsına, Omar Uzaqov, Tolǵanaı Turǵanova, 5 «B» Álııa Shektibaeva, Adııa Muhamedıeva, Alan Morav, 5 «V» synybynda Danıal Marat, Arsenıı Federenko, Tomırıs Mashýt berilgen tapsyrmany krıterıılerge saı, óleńdi jattap, vıdeolaryn jiberdi. Meniń maqsatym – óleńdi basty nazarǵa ala otyryp, yntymaqtastyqpen oqytý, oqýshylardyń jaýapkershilikti sezinip, vıdeo dálelderimen qyzyqtyra otyryp, bilim alýdaǵy qabiletterin arttyrý.
Kundelik.kz saıtynyń kómegimen oqýshylarǵa usynylǵan tapsyrmalaryn júktep, qaıta keri baılanys alýǵa taptyrmas múmkindik alyp otyr. Kundelik.kz – muǵalim tarapynan sabaqqa qatysý belsendiligin baǵalaýdaǵy utymdy platformalardyń biri. Mektep ákimshiligi muǵalimderge ótkizilgen sabaqtarǵa monıtorıng júrgizip, apta saıyn Zoom platformasynyń kómegimen onlaın-keńes berýde.
Aıdana BOLATHAN,
M.Mámetova atyndaǵy №28 mektep lıseıdiń qazaq tili men ádebıeti páni muǵalimi
ALMATY
