– Bizdiń Shaldaı aýylyndaǵy balalar úıi jabylady, al sábılerdi basqa jerge alyp ketedi eken degen sybysty estip, jubaıym Gúlnár ekeýimiz aqyldasyp, jetim balalardy asyrap almaqshy boldyq. Balalar úıi basshylarynyń aıtýyna qaraǵanda, apaly-sińlili Nına, Olıa, Masha Kondratevalardy jas aıyrmashylyqtaryna baılanysty úsh mekemege bólip jibermek bolǵan. Biz bir áke-shesheden ósip-óngen osy qyzdardy otbasymyzǵa alamyz dep sheshtik, – deıdi bul jóninde Qaırat aǵanyń ózi.
– Shynyna kelsek, basynda qıyn boldy, – deıdi Gúlnár apaı aǵynan jarylyp. – Alǵashynda balalar bir-birin túsinbeı, sózge kelip qala beretin. Ýaqyt óte kele olar baýyrmal bola bastady. Osylaısha Álııa, Mádına, Lılııa, Náılá, Ásııa, Nına, Olıa, Marııalar bir úıdiń balasyndaı bolyp boıjetti. Búginde tek Náılá men Ásııa ǵana mektep oqýshylary. Nına oqý ornyn támamdap Pavlodar oblysy, Sharbaqty aýdanyndaǵy qorǵanys jónindegi basqarmasynda jumys isteıdi. Olıa men Marııa – kolledjdiń stýdentteri. Qudaı qalasa, ári qaraı oqımyz dese, qoldan kelgenniń bárin jasaımyz, turmys quramyz dese, toıyn jasaımyz.
Qaırat pen Gúlnár úlken qyzdary Álııa jáne Mádınadan Imran, Arııa atty jıen súıip otyr. Qazaqta «Jaqsylardyń kóńili – altyn sandyq» degen jaqsy sóz bar. Osy sóz júrekteri syrly, ımany tógilgen Qaırat pen Gúlnár Nurumovtarǵa arnalyp aıtylǵandaı. Endi olardyń bul ıgi tirligi basqalarǵa úlgi-ónege bolsa eken.
Saparǵalı JAǴYPAROV,
áskerı jýrnalıst
Pavlodar oblysy
