Aımaqtar • 02 Mamyr, 2020

Qaraǵandy oblysy: Tórtinshi mamyrdan bastap tirlik jandanady

604 retkórsetildi

Karantın qursaýynyń bosańsyǵany kásibi toqtap, qaltasy juqarǵan biraz jurttyń kóńilinde úmit otyn jaqty. Mysaly, Qaraǵandy oblysynda Temirtaý qalasynan basqa eldi mekenderde halyqqa qyzmet kórsetetin birqatar nysandardyń jumysy qaıtadan jandanatyn boldy. Bul týraly arnaıy brıfıng barysynda Qaraǵandy oblysynyń bas memlekettik sanıtarlyq dárigeri Qanat Asqarov málimdedi.

Sonymen, mamyr aıynyń 4-shi juldyzynan bastap karantınniń tizimine kirgen qalalar men eldi mekenderdiń turǵyndary aldyn ala jazylý boıynsha shashtaraz jáne sulýlyq salondary qyzmetterin paıdalana bastaıdy. Aqsha aıyrbastaý pýnktterine jáne azyq-túlikten de ózge taýarlar satatyn dúkenderge bara alady. Gazet-jýrnal dúńgirshekteri men baspa ónimderin satý núkteleri de jumys isteı bastaıdy.

Dúken demekshi, aýmaǵy 500 sharshy metrden aspaıtyn barlyq saýda núkteleri saǵat keshki segizge deıin jumys isteıtin bolady.

Budan bólek, ruqsat alǵan tizimde fotosalondar, gúl satatyn dúkender bar. Turǵyndar aldyn ala jazylyp, stomatologııalyq kabınetter men klınıkalarǵa bara alady. Mıkroqarjy jáne saqtandyrý uıymdary, jarnama agenttikteri, jyljymaıtyn múlik kompanııalary, baspahanalar, lombardtar, aıyrbastaý pýnktteri, aqparattyq-kommýnıkasııalyq tehnologııalar kásiporyndary, jeke sot oryndaýshylary, zańdy jáne notarıaldyq keńseler qyzmetine kiresedi.

– Mamyrdyń tórtinen bastap dalada jeke sporttyq sabaqtar ótkizip, jattyǵýlar jasaýǵa ruqsat etiledi. Sondaı-aq, 1 mamyr kúni saǵat 00.00-den bastap sanıtarlyq sharalardy saqtaı otyryp, Qaraǵandy oblysynyń barlyq aýmaǵynda saıajaı ýchaskelerine jol ashylady, – dep ketpen-kúregin saılap otyrǵan aǵaıyndy da qýantyp qoıdy Qanat Asqarov.

Sóziniń sońynda oblystyń bas sanıtarlyq dárigeri jumysy qaıta jandanatyn nysandardyń sanıtarlyq-epıdemıologııalyq qaýipsizdik talaptaryn qamtamasyz ete otyryp ashylýy tıis ekenin eske saldy.

Sońǵy jańalyqtar

Jigittiń jaqsysy

Rýhanııat • Keshe

Uqsas jańalyqtar