Eshkim de, eshqashan da umytylmaıdy. Esil aýdanynda surapyl maıdanǵa qatysqan ardager joq. Olardyń eń sońǵysy osydan eki jyl buryn ómirden ozǵan. Al qan maıdanǵa attanyp, Jeńisti kúnge jetýge atsalysqan esildikter sany 3 myńnan asady. Olardyń urpaqtary qazir ata-baba erligin dáriptep, tarıhyn aıtyp, beınejazba túsirýde. Ony aýdandyq jastar resýrstyq ortalyǵy óz áleýmettik paraqshasynda jarııalaıdy.
– Tótenshe jaǵdaıǵa baılanysty bıyl Uly Jeńistiń 75 jyldyǵy jańasha formatta ótkizilmek. Qazirgi tańdaǵy indettiń oryn alýyna baılanysty qazaqstandyqtar úıde otyrýǵa májbúr. Degenmen el qorǵaǵan erlerdi eske alý bizge mindet. Jeńis kúni qarsańynda ǵalamtor jelisi arqyly aýdan turǵyndaryna «Máńgilik polk» atty onlaın aksııa ótkizetindigimiz týraly habarladyq,–deıdi aýdandyq jastar resýrstyq ortalyǵy jetekshisiniń mindetin atqarýshy Nazgúl Nurlybekqyzy.
Búginde jastar ortalyǵyna on shaqty aýdan turǵynynan maıdangerler jaıynda aqparat, beınebaıan kelip túsken.
– Biz, óz ákelerimiz ben atalarymyzdyń maıdandaǵy eren erligin umytpaımyz. Surapyl urysqa attanǵan qazaqstandyqtardyń arasynda bizdiń ákemiz Baızýlla Aıǵaıbekov te boldy. Ásker qataryna ol 1940 jyly Eńbekshilder aýdanynyń áskerı komıssarıatynan attandy. Ákem basynan keshkeni týraly aıtyp otyratyn. Ol soǵystyń basynan bastap, sońyna deıin aldyńǵy shepte júrdi,–deıdi ardagerdiń qyzy Altynaı Aıǵaıbekova.
Tarıh eshqashan umytylmaıdy degen osy-aý.
Aqmola oblysy
