Aımaqtar • 03 Mamyr, 2020

Búgin Jambyl oblysynda koronavırýs juqtyrýdyń deregi 146-ǵa jetti

215 retkórsetildi

О́kinishke qaraı, Jambyl oblysynda koronavırýs ınfeksııasyn juqtyrý deregi kún saıyn tirkelýde. 1 mamyr kúngi jaǵdaı boıynsha qaýipti indet juqtyrǵandar sany 136-ǵa jetse, 2 mamyr kúni bul kórsetkish 143-ke jetken. Al, sońǵy táýliktegi aqparat boıynsha óńirde koronavırýs indetiniń taǵy úsh jańa jaǵdaıy anyqtalǵan.

Jambyl oblystyq ákimdiginiń málimeti boıynsha, qaýipti indettiń belgileri 1962 jyly jáne 1992 jyly týǵan azamattardan tabylǵan. Bul derekter Taraz qalasynda anyqtalyp otyr. Olar buǵan deıin naýqastarmen baılanys barysynda ınfeksııa juqtyrǵan. Sondaı-aq, atalǵan dıagnoz Shý aýdanynyń 23 jastaǵy turǵynynan da rastaldy. Onyń alys qashyqtyqqa qatynaıtyn júrgizýshi bolyp jumys isteıtindigi belgili boldy. Algorıtmge sáıkes memlekettik shekarany kesip ótý kezinde, «Qarasý» ótkizý pýnktinde odan aýrýdyń bar-joǵyn rastaıtyn zerthanalyq zertteý úshin taldaý alynǵan.

 Búginde naýqastar ınfeksııalyq stasıonarǵa aýystyrylǵan. Olarmen baılanysta bolǵan adamdardy anyqtaý, olardan zerthanalyq taldaý alý jumystary júrgizilýde. Oshaqtarda dezınfeksııalyq óńdeý sharalary atqarylǵan.

Aǵymdaǵy jylǵy 3 mamyr kúngi jaǵdaı boıynsha Jambyl oblysynyń aýmaǵynda koronavırýstyq ınfeksııanyń 146 jaǵdaıy tirkelip otyr. Onyń ishinde Taraz qalasynda 69, Baızaq aýdanynda 7, Jambyl aýdanynda 5, Qordaı aýdanynda 37, Merki aýdanynda 3, Shý aýdanynda 2 jáne Moıynqum aýdanynda 1 derek anyqtalǵan. Sondaı-aq, «Delı – Taraz» reısinen alty oqıǵa, Atyraý oblysyndaǵy Teńiz vahtalyq kentinen kelgen jumysshylar arasynan 16 oqıǵa anyqtalǵan. Búginide koronavırýs indetin juqtyrǵandardyń 48-i emdelip, dárigerlerdiń baqylaýyndaǵy úı karantınine shyǵarylǵan. 

 

Jambyl oblysy

Sońǵy jańalyqtar

Jigittiń jaqsysy

Rýhanııat • Keshe

Uqsas jańalyqtar