Sol sııaqty ult ustazy Ahmet Baıtursynulynyń da «Tilek batam» deıtin óleńinde:
Dáreti joq aıaqtar,
Qorsyldaǵan saıaqtar,
Bylǵamasyn qasyńdy,
Qasıetti basyńdy, - dese,
ataqty aqyn Dýlat Babataıuly:
Imandy bul dúnıede er suraıdy,
Titirep dáretsizden jer jylaıdy, - degen eken.
Joǵarydaǵy jyr joldaryna úńilgen adam, dárettiń qoǵamyndaǵy mańyzyn túsiner edi. Sol sııaqty Shákerim qajynyń balasy Ahattyń esteligende: «Abaıdyń ájesi Zere Qunanbaıdy dáretsiz emizbegen» degen derekti aıtady. Osyny tilge tıek etken aıtys aqyn Muhamedjan Tazabek:
Keshegi Kenesary tulparyna,
Dońyzdyń basqan shóbin jegizbegen.
Tektilik úlgisindeı Zere ájemiz,
Qunanbaıdy dáretsiz emizbegen.
Atanyń boıyndaǵy tazalyqtan,
Abaı týdy tektilik negizbenen – dep jyrlapty.
Dáretpen júrýdi atam qazaq ejelden ádet qylǵan. Ardaqty sahaba Ábý Hýraıra (r.a.) súıikti paıǵambarymyzdyń (s.ǵ.s) bylaı degenin jetkizedi: «Allanyń dinin ustanatyn quly dáret alyp betin jýǵanda, onyń betinen sýmen birge kózimen kórgen (jasaǵan) kúnálary ketedi, qolyn jýǵanda sýmen birge qolymen istegen kúnálary ketedi, aıaǵyn jýǵanda sýmen birge aıaǵymen barǵan kúnálary ketedi, osylaı ol búkil kúnálarynan bosap shyqqansha jalǵasady» (Múslim).
Qaı kezde bolsyn din ǵulamalary árdaıym dáretpen júrý úshin tamaqty óte az mólsherde ishetin bolǵan. Msyaly, ımam Malık úsh kúnde bir ret tamaqtanady eken. Sebebin suraǵandarǵa: «Alla Taǵalanyń aldynda jıi-jıi dáret buzýdan uıalamyn» deıtin kórinedi.
Bilgen janǵa dáret – dinniń bir bólshegi. Onsyz adam balasy namaz oqyp, Qaǵbaǵa taýap ete almaıdy. Qurandy da dáretsiz qolmen ustaı almaıdy.
