Aımaqtar • 04 Mamyr, 2020

Kommýnaldyq qyzmetter úshin tólem jasaý tártibi túsindirildi

1034 retkórsetildi

Búgin Ortalyq kommýnıkasııalar qyzmetinde ótken baspasóz máslıhatynda IIDM Qurylys jáne turǵyn úı kommýnaldyq sharýashylyq isteri komıteti tóraǵasynyń orynbasary Beıbit Shahanov karantın engizilgen qalalarda kommýnaldyq qyzmetterdi óteý máselesi boıynsha aıtyp berdi.

Memleket basshysynyń tótenshe jaǵdaıǵa baılanysty karantın engizilgen qalalardyń turǵyndary úshin kommýnaldyq tólemderdi tómendetý máselesi boıynsha keshendi sheshim ázirleý jónindegi tapsyrmasyna sáıkes halyqtyń áleýmettik qorǵalmaǵan toptaryn negizge ala otyryp jáne jergilikti atqarýshy organdardyń usynystary negizinde mynadaı sanattar belgilendi:

1) 1, 2, 3 top múgedekteri;

2) múgedek balalardy tárbıelep otyrǵan otbasylar;

3) kópbalaly otbasylar;

4) Uly Otan soǵysynyń múgedekteri men qatysýshylary jáne Uly Otan soǵysynyń múgedekteri men qatysýshylaryna teńestirilgen tulǵalar;

5) memlekettik jáne qoǵamdyq mindetterin,  áskerı boryshyn oryndaý kezinde qaza tapqan adamdardyń otbasylary;

6) eń tómengi zeınetaqy alatyn zeınetkerler;

7) ataýly áleýmettik kómek alatyn azamattar, onyń ishinde jalǵyz basty zeınetkerler.

15 myń teńge somasyna shyǵyndardy óteý joǵaryda kórsetilgen sanattaǵy azamattardyń ákimdikke júginýleri negizinde ǵana júrgiziledi.

Áleýmettik kómek alýshyǵa Aqparattyq júıeler nemese call-ortalyq arqyly ákimdikke óziniń JSN, áleýmettik mártebesi men jeke shotynyń nómirin usyna otyryp ótinim berý jetkilikti.

Call-ortalyq arqyly aýyzsha ótinish berý jetkilikti. Sonymen qatar, qosymsha ózge qujattardy usyný talap etilmeıtinin aıta ketý kerek.

Budan ári, ákimdik usynylǵan derekterdi tekserip, durys bolǵan jaǵdaıda azamattyń jeke (abonenttik) shotyna qarajat aýdarady.

Kómek Qaǵıdada kórsetilgen sanattarǵa jatatyn, kommýnaldyq qyzmet kórsetýshilermen óz atynan kelisim-shart jasaǵan jáne karantın engizilgen eldi mekende turatyn adamdardyń barlyǵyna kórsetiledi.

Múgedek balalardy tárbıelep otyrǵan jáne kópbalaly otbasylar, memlekettik jáne qoǵamdyq qyzmetin, áskerı boryshyn ótep júrgen kezde qaza tapqan adamdardyń otbasy músheleriniń biriniń qyzmet kórsetýshilermen sharty bolýy tıis.

Sońǵy jańalyqtar

Jigittiń jaqsysy

Rýhanııat • Keshe

Uqsas jańalyqtar