«Osyndaı kúrdeli kezeńde halyqqa kómek kórsetilmese memlekettiligimizge syn emes pe?! Árıne, aqsha taratyp berýmen ahýal túzelmeıdi. Daǵdarys jaǵdaıynda keshendi ári júıeli sharalar uıymdastyrǵan abzal. Eń aldymen, jastardy jumysqa ornalastyrý kerek. Sondyqtan 250 myńnan astam jumys orny ashylady. Ár óńirde ınfraqurylymdyq jáne ınjenerlik jobalar, turǵyn úı-kommýnaldyq sharýashylyq nysandary bar. Mine, jumyssyz qalǵandardy solardyń qurylysyna, jóndeý jumystaryna jumyldyrýdamyz», - dedi Memleket basshysy.
Sondaı-aq Prezıdent isker azamattardy qoldaý maqsatynda nesıeni qaıtarý merzimi keıinge shegerilgenin atap ótti.
«Ýaqytsha qıyndyqqa tap bolǵan 1,6 mıllıon kásipkerdiń nesıesin qaıtarý merzimi keıinge shegerildi. Mundaı shara isker azamattardy qoldaý úshin qajet. Sondaı-aq, «Qarapaıym zattar ekonomıkasy» baǵdarlamasynyń qarjysy 1 trıllıon teńgege deıin kóbeıtildi. Bul qarajat jańa jobalardy qaıta qarjylandyrýǵa, jeńildik sharttarymen nesıe berýge jumsalady. Kásipkerler úshin salyqtar men basqa da mindetti tólemder merzimi uzartyldy. Zardap shekken shaǵyn jáne orta bıznes ókilderi eńbekaqy tóleý qorynyń mindetti tóleminen alty aıǵa bosatyldy», - dedi Prezıdent.
