Eń áýeli «QazMunaıGazdyń» basty mindeti qyzmetkerlerdiń densaýlyǵy men ál-aýqatyna qamqorlyq jasaý ekenin atap ótken basqarma tóraǵasynyń orynbasary epıdemııalyq jaǵdaı kezindegi jedel iske qosylǵan daǵdarysty basqarý tobynyń ilkimdi jumysyna toqtaldy.
– Birinshi toqsandaǵy negizgi óndiristik kórsetkishter oryndaldy. Munaı jáne gaz kondensatyn óndirý deńgeıi 5,9 mln tonnany qurady, bul ótken jyldyń birinshi toqsanyndaǵy deńgeıge jýyq. 4 mln tonnaǵa jýyq nemese ózimiz óndirgen munaıdyń 69%-y eksporttaldy, – dedi Dáýren Qarabaev. Alaıda koronavırýs indeti men munaı óndirisin ujymdyq qysqartý týraly OPEK+ kelisimimen munaıǵa álemdik suranystyń kúrt tómendeýi osy jyldyń ekinshi toqsanynda QMG óndirisin shekteýge ákelip otyr. Onyń aıtýynsha, OPEK+ kelisimine sáıkes Qazaqstan óndiristi táýligine 390 myń barrelge qysqartýǵa tıis. Osyǵan sáıkes Energetıka mınıstrligi munaı óndirýdi shekteýi qajet jeke jer qoınaýy ýchaskeleriniń tizbesi bar Úkimet qaýlysynyń jobasyn ázirledi.
Alaıda munaı tasymaldaý men gaz óndirý salalarynyń jaǵdaıy jaman emes. Sebebi osy eki sektorǵa munaı baǵasynyń qubylýy qatty áser etip otyrǵan joq. Gaz tasymaldaý kólemi 28,3 mlrd tekshe metrge deıin ósip otyr. О́sim negizinen Qazaqstan arqyly gaz tranzıtiniń ulǵaıýyna baılanysty.
Jahandyq pandemııanyń QMG óńdeý sektoryna da áser etkeni ataldy.
– Birinshi toqsanda otandyq munaı óńdeý zaýyttarynda kómirsýtekti qaıta óńdeý kólemi 3,3 mln tonnany qurady jáne ótken jylmen salystyrǵanda sál joǵary boldy. Biraq 2020 jyldyń sáýirinde Qazaqstannyń iri qalalarynda karantınniń engizilýine baılanysty Qazaqstandaǵy munaı ónimderiniń negizgi túrlerine suranys edáýir tómendedi. Biz zaýyttardyń júktemesin azaıttyq. 25 sáýirden bastap Pavlodar zaýyty josparly profılaktıkalyq jóndeý jumystaryna toqtatyldy, – dedi «QazMunaıGaz» UK» AQ Basqarma tóraǵasynyń orynbasary Dáýren Qarabaev.
Buǵan qosa ol daǵdarysqa qarsy sharalar retimen tanystyryp ótti. Jedel shara retinde, qazirdiń ózinde 2020 jylǵa josparǵa qaraǵanda 87,4 mlrd teńge kúrdeli shyǵyndar alyp tastalǵan, osy rette 5 jyl ishinde kúrdeli shyǵyndardyń azaıýy 406,4 mlrd teńgeni quraıdy. Al 2020 jylǵa arnalǵan jalpy jáne ákimshilik shyǵyndar, ortalyq apparattaǵy konsaltıng qyzmetteri men basshylyqtyń syıaqy qorynan bas tartýdy qosa alǵanda, 15,7 mlrd teńgege azaıtyldy. Operasııalyq shyǵyndar 24,2 mlrd teńgege tómendetilgen. 2020 jyly qysqartylǵan jalpy qarajat somasy 127,3 mlrd teńgeni quraıdy.
– Biz negizgi óndiriske baılanysty emes operasııalyq, ákimshilik jáne kúrdeli shyǵyndardan bastadyq. Sonymen qatar marketıng jáne logıstıka salasynda jumys isteımiz. Aınalym kapıtaly da ońtaılandyrylǵan, – deıdi Dáýren Qarabaev.
Atqarylyp jatqan is-sharalar kesheniniń ýaqytsha emes, turaqty negizde jumys isteıtinin aıtqan ol, qysqamerzimdi sharalardan basqa 2021 jyldyń sońyna deıin júzege asyrylatyn daǵdarysqa qarsy strategııa daıarlanatynyn atap ótti.
– Biz basqarý modelin ózgertý úshin jumys istep jatyrmyz. Nátıjesinde QMG basqarýǵa ıkemdi, tez áreket etýge jáne bıznes úshin eń az shyǵyndarmen daǵdarystyń saldaryn eńserý úshin tıimdi sheshimder qabyldaýǵa qabiletti kompanııaǵa aınalýy tıis. Kóptegen fýnksııadan bas tartamyz jáne strategııalyq máselelerdi sheshýge nazar aýdarý úshin enshiles kompanııalarmen ózara yqpaldastyqtyń tetikterin qaıta qarastyramyz, – dedi Dáýren Qarabaev. Onyń aıtýynsha, barlyq kúsh kelesi jylǵa deıin eki negizgi máseleni sheshýge jumyldyrylady. Birinshiden, kompanııa qyzmetin naryqtyń jańa jaǵdaılaryna beıimdeý jáne ıkemdi óndiristik jáne kadrlyq áleýetti saqtaı otyryp, kompanııanyń qarjylyq jaǵdaıyna jaǵymsyz faktorlardyń áserin azaıtý. Ekinshiden, daǵdarys aıaqtalǵannan keıin jumysyn qaıta jandandyrý úshin qor, tehnologııa men quzyretterdi jınaqtaý.
Barlyq munaı-gaz sektory sııaqty, qazirgi ahýal kezinde bolashaq kórsetkishterge qatysty naqty boljam jasaý qıyn. Salanyń ereksheligine qaraı, el ekonomıkasyn qoldaý jáne úzdiksiz óndiristik prosesti qamtamasyz etý úshin QMG óndiristik qyzmetin toqtatpaı, naryqtaǵy jaǵdaıdy jiti baqylaı otyryp, múddeli taraptarmen birge qajetti sharalar qabyldaıtyn bolady.
