Parlament • 05 Mamyr, 2020

Senat Tóraǵasy saılandy

25 ret kórsetildi

Keshe Memleket basshysy Qasym-Jomart Toqaevtyń qatysýymen Parlament Senatynyń otyrysy ótti.

Eldi  bilimdi azamattar órge súıreıdi

Prezıdent Qasym-Jomart Toqaev Parlament Senaty depýtattarynyń aldynda sóılegen sózinde aldymen búkil álemdi alańdatqan indet kezinde el azamattarynyń qaýipsizdigi úshin qolǵa alynǵan is-sharalarǵa toqtalyp, pandemııanyń saldarynan týyndaǵan daǵdarysqa qarsy jumystardy pysyqtady.

– Búkil elimiz osy indetke qarsy kúresý úshin judyryqtaı jumyla bildi. Ásirese, dárigerler, áskerı qyzmetshiler, polıseıler, volonterler kún-tún demeı jumys isteýde. Olardyń bári Otanǵa adal qyzmet etýdiń ozyq úlgisin kórsetti. Syn saǵaty qasıetti Ramazan aıymen tuspa-tus keldi. Halyqtyń jigerin qaırap, tózimin shyńdaýǵa munyń da áseri boldy. Biz der kezinde qolǵa alynǵan sharalardyń arqasynda indettiń jappaı taralýyna tosqaýyl qoıdyq. Muny Dúnıejúzilik densaýlyq saqtaý uıymy, halyqaralyq sarapshylar joǵary baǵalady. Pandemııa el ekonomıkasyna keri áserin tıgizip otyr. Osyǵan oraı, Úkimet azamattarǵa, shaǵyn jáne orta bıznes ókilderine qoldaý kórsetýde. Bıýdjetten qomaqty qarajat bólindi.

Tabysynan aıyrylǵan adamdar qar­jy­laı kómek alyp jatyr. Munyń bári halyq­tyń turmys jaǵdaıyn tómendetpeý úshin jasalýda. Qabyldanǵan sharalar óz nátıjesin bere bastaǵanyn kórip otyr­myz. Jaǵdaı kúrdelenip ketpese, tó­tenshe jaǵdaı rejimi 11 mamyrda aıaqta­lady. Biraq karantın rejimine baılanysty is-sharalar jalǵasa beredi. Bul el tur­ǵyn­darynyń qaýipsizdigi úshin asa qajet. Aza­mattarymyz birte-birte qalypty ómirge qaıta oralady dep senemin, – dedi Qasym-Jomart Toqaev.

Sózin osylaı sabaqtaı kele Memleket basshysy uzaq merzimdi strategııalyq damý jolymyz bar ekenin, qandaı qıyndyq bolsa da, Elbasymyzdyń strategııasyn júzege asyratynymyzdy málimdedi.

– Bul – saıası sabaqtastyqty saqtaý degen sóz. Táýelsiz Qazaqstannyń Tuńǵysh Pre­zıdenti – memleketimizdiń negizin qalaýshy, álemdik deńgeıdegi tarıhı tulǵa. Muny eshqashan umytpaýymyz qajet. Sondaı-aq óskeleń urpaqqa túsindirgenimiz jón. Biz daǵdarystan keıingi kezeńge qazirden bastap daıyndalýymyz kerek. Qandaı kúrdeli jáne qaýipti bolsa da, daǵdarys – ótpeli nárse. Ol jańa múmkindikterge jol ashady. Sondyqtan Elbasy 24 sáýirde Qaýipsizdik keńesiniń otyrysynda keleshektegi ekonomıkalyq strategııamyz jóninde aıtyp, aıqyn baǵdar kórsetti. Men 27 sáýirde arnaıy málimdeme jasadym. Úkimet pen ákimderdiń aldyna naqty min­det­ter qoıdym. Osyǵan oraı keshendi is-qı­myl baǵdarlamasy bar dep kúmánsiz aıtýǵa bolady. Ony eshqandaı qosymsha málimdemelermen tolyqtyrmaı júzege asyrǵan jón. Qazir Úkimet pen Ulttyq bank Ekonomıkalyq damýdy qalpyna keltirý úshin jumys júrgizýde. 11 mamyrǵa deıin arnaıy jospar daıyndalmaqshy, – dedi Qasym-Jomart Toqaev.

Memleket basshysy pandemııanyń el eko­nomıkasyna keri áserin tıgizip otyr­ǵanyna nazar aýdaryp, ekonomıkada túbe­geıli reforma júrgizý kerek ekenin alǵa tartty. Bul rette eń aldymen, ekono­mıkalyq ósimdi qalpyna keltirip, halyqtyń ál-aýqatyn arttyrý máselesine basymdyq berildi.

– Biz osy pandemııadan sabaq alýymyz kerek. Keıbir salalarda kemshin tustarymyz bar. Muny indetten týyndaǵan ahýal anyq ańǵartty. Sondyqtan alda turǵan birqatar mindetke nazar aýdarǵym keledi. Birinshi kezekte densaýlyq saqtaý júıesine basa mán bergen jón. Bul salany jańǵyrtý úshin tyń bastamalardy qolǵa alýymyz qajet. Zaman talabyna saı aýrýhanalar salyp, qajetti qural-jabdyqpen qamtamasyz etý asa mańyzdy. Budan bylaı medısına ǵylymyn damytýǵa erekshe kóńil bólýimiz kerek. Osy salada eńbek etip júrgen ǵalymdarymyzdyń áleýeti zor. Mamandarǵa laıyqty jaǵdaı jasap, naqty qoldaý kórsetken abzal. Sonymen qatar bilim jáne ǵylym salasyn tolyǵymen jańǵyrtatyn bolamyz. Osy rette ozyq tehnologııalar men sıfrlandyrýdy keńinen qoldanýymyz kerek. Bul – basty mindetterdiń biri. Biz básekege qabiletti ult qalyptastyrý úshin adam kapıtalyn damytýymyz kerek. Bul – strategııalyq mańyzy bar mindet. О́ıtkeni Qazaqstannyń bolashaǵy bilimdi ári bilikti azamattardyń qolynda, – dedi Prezıdent.

Qasym-Jomart Toqaev tótenshe jaǵdaı kezeńinde memleket muqtaj jandardy erekshe qamqorlyqqa alǵanyn, mundaı is-sharalar, tipti, damyǵan memleketterde de bolmaǵanyn atap ótti. Sondaı-aq ol taǵy bir mańyzdy maqsat retinde shaǵyn jáne orta bıznesti órkendetýge mán berip, buǵan memleket tarapynan barynsha qoldaý kórsetý kerek ekenin aıtty.

– Ulttyq ekonomıkany ártarap­tandyrý – kezek kúttirmeıtin mindet. Shıkizatqa táýeldilikten arylý úshin otandyq óndiristiń jumysyn jandandyrý qajet. Bul – ońaı másele emes. Degenmen ony basty nazarda ustaımyz. Biz qolǵa alǵan saıası reformalardy jalǵastyra beremiz. Onsyz memleketimiz damymaıdy. Osy rette memlekettik basqarý júıesiniń tıimdiligin arttyrý asa mańyzdy. Bizge basshylardyń jańa býynyn tárbıeleý kerek. Eldiń múddesin oılaıtyn mamandar bolmasa, bas­tamalarymyz nátıjesin bermeıdi. Osy turǵyda men usynǵan «Halyq únine qulaq asatyn memleket» tujyrymdamasynyń mańyzy zor dep oılaımyn. Jalpy, biz Elbasy maquldaǵan Ult josparyn mindetti túrde júzege asyrýymyz kerek. Bul – búgingi zamannyń talaby, – dedi Qasym-Jomart Toqaev.

Osy rette Memleket basshysy qoǵamdaǵy ózekti máselelerdiń oń sheshilýine qashanda belsene aralasatyn Parlamenttiń, sonyń ishinde Senattyń róline arnaıy toqtaldy.

– Búkil elimizdiń aldynda turǵan osyndaı mindetterdi oryndaý úshin eń aldymen bılik tarmaqtary arasyndaǵy úılesim qajet. Mańyzdy reformalardy júzege asyrýda Parlamenttiń, ásirese, Senattyń róli de, quzyreti de erekshe. Senattyń eń basty mindeti – sapaly zańdardy qabyldaý. Mundaı zańdar reformalarǵa jol ashady, turaqtylyq pen tártipti qamtamasyz etedi. Senat depýtattary zań jobalaryn talqylaý kezinde nemese basqa formattaǵy basqosýlar barysynda qoǵamymyzdaǵy eń ózekti, eldi alańdatatyn máseleler jóninde ótkir oılar, synı pikirler aıtýǵa quqyly. Bul másele boıynsha daý joq. Bul rette sizderdiń jumystaryńyz óte jaýapty ekenin jaqsy bilemin, – dedi Prezıdent.

 Usynylǵan kandıdatýrany qoldady

Memleket basshysy Parlament Sena­ty­nyń jumysyna kózqarasy jaqsy eke­nin ańǵartyp, Darıǵa Nazarbaevanyń Senat Tóraǵasy laýazymynda atqarǵan qyzmetin joǵary baǵalady.

– О́zderińizge málim, meniń Jarlyǵym­men Senat depýtaty Darıǵa Nursultanqyzy Nazarbaevanyń ókilettigi toqtatyldy. Ol Senat Tóraǵasy retinde bir jyldan astam belsendi ári jemisti jumys istedi. Sol úshin Darıǵa Nursultanqyzyna rızashylyǵymdy bildirdim, – dedi Prezıdent.

Búgingideı kúrdeli kezeńnen elimizdi aman-esen alyp shyǵý úshin Senat depýtattaryn jumyla jumys isteýge shaqyrǵan Qasym-Jomart Toqaev Parlament Sena­tynyń Tóraǵasy laýazymyna Máýlen Áshim­baevtyń kandıdatýrasyn usyndy.

– Meniń Jarlyǵymmen Máýlen Áshim­baev Senat depýtaty bolyp taǵaı­yn­daldy. Konstıtýsııanyń 58-babynyń 1-tarmaǵyna sáıkes Parlament Senatynyń Tóraǵasy laýazymyna Máýlen Saǵathanuly Áshimbaevtyń kandıdatýrasyn usynamyn. Ol memleket qyzmetiniń qyr-syryn jetik meńgergen, uzaq jyl túrli salada jemisti jáne tıimdi jumys atqardy. Parlament jumysyn jaqsy biledi. Árdaıym ózine júktelgen mindetterdi abyroımen atqaryp keledi. Memlekettik qyzmettegi tájirıbesi mol. Sondyqtan bul qyzmetti abyroımen atqaratynyna kúmánim joq. Máýlen Áshimbaevtyń kandıdatýrasyn Senat Tór­aǵalyǵyna laıyqty dep sanaımyn, – dedi Qasym-Jomart Toqaev.

Prezıdent Senat depýtattarynyń ju­my­syna jemis tileı otyryp, árdaıym baǵyt-baǵdarymyzdan jańylmaı, alǵa batyl qadam jasaýǵa shaqyrdy, birligimiz be­kem bolsa, kez kelgen qıyndyqty eńsere­tinimizdi basa aıtty.

Prezıdenttiń usynysy boıynsha sena­tor­lar jasyryn daýys berý arqyly Máý­len Áshimbaevty Parlament Senatynyń Tóraǵasy etip biraýyzdan saılady. Daýys berý qorytyndysyn Senat Tóraǵasynyń orynbasary Bektas Beknazarov jarııalady.

О́z kezeginde jańa laýazymǵa saılanǵan Máýlen Áshimbaev Prezı­dentke jáne senatorlarǵa joǵary senim bildirgeni úshin rızashylyǵyn bildirdi.

– Prezıdentimiz elimizdiń aldynda turǵan maqsattarǵa jan-jaqty toqtalyp ketti. Qazirgi ýaqyttaǵy eń ózekti másele, ol árıne, pandemııamen – búkil álemge taraǵan osy indetpen kúresti jalǵastyrý. Memleket basshysy atap ótkendeı, barlyq memlekettik organdardyń basty mindeti tótenshe jaǵdaı rejimi aıaqtalǵannan keıin Elbasymyzdyń saıasatynyń sabaqtastyǵyn saqtap, memleketimizdi, ekonomıkany odan ári damytýǵa, elimizdiń ál-aýqatyn art­tyrýǵa baǵyttalǵan Prezıdentimizdiń strategııasyn iske asyrý – barlyq memle­kettik organnyń aldynda turǵan eń negizgi maqsat. Qazaqstan Parlamenti Sena­ty Memleket basshysynyń saıasatyn zań­namalyq turǵyda sapaly qamtamasyz etý úshin qajetti bar­lyq sharany júzege asyrýǵa kúsh salady, – dedi Máýlen Áshimbaev.

Sońǵy jańalyqtar

Germanııanyń ustanymy ózgere me?

Álem • Búgin, 06:52

Ury alysqa uzamady

Aımaqtar • Keshe

Uqsas jańalyqtar