Qalalyq bilim basqarmasynyń basshysy Sholpan Qadyrova kolledjderdegi aralyq jáne qorytyndy attestasııa, dıplom jumysyn qorǵaý bilim berý uıymynyń oqý josparyna sáıkes júretinin atap ótti. Onyń aıtýynsha, bilim berý uıymy emtıhan suraqtaryn aldyn-ala ázirlep, jalpyǵa qoljetimdi bolý úshin qashyqtan oqytý portalyna ornalastyrady.
«Dıplom jumysyn (jobany) aldyn ala qorǵaý bilim berý uıymy jasaǵan kestege sáıkes, óz ýaqytynda oryndalady. Memlekettik emtıhan qabyldaý men stýdentterdiń dıplomdyq jumysyn qorǵaý (joba) onlaın rejımde ótedi. Onlaın-proktorıng bilim alýshynyń ózin-ózi ustaýyn ekran arqyly baqylap, emtıhandy vıdeoǵa jazýǵa múmkindik beredi», – dep túsindirdi Sh.Qadyrova.
Sondaı-aq barlyq kolledjderde oqytýshy, stýdent, ata-analarǵa ýaqtyly tehnıkalyq qoldaý (onlaın-keńes) kórsetip, oqý prosesiniń uıymdastyrylýyn únemi baqylaýda ustap, keri baılanys ornatýdy qamtamasyz etetin shtab quryldy.
Bilim basqarmasy basshysynyń aıtýynsha, tehnıkalyq jáne kásiptik bilim berý uıymdaryna oqýǵa qabyldaý erejelerine sáıkes, kolledjge qujat tapsyrý 20 maýsym men 25 tamyz aralyǵynda bastalady. Qujattardy kolledjdiń qabyldaý komıssııasyna qaǵaz túrinde nemese e.astana.kz saıtyna elektrondy túrde tapsyrýǵa bolady.
«Talapkerdi qabyldaý emtıhandary kolledj bazasynda tańdalǵan mamandyqqa baılanysty ótedi. Elimizde sanıtarlyq-epıdemıologııalyq rejım uzarǵan jaǵdaıda, qujat qabyldaý men emtıhan ótkizý formasy týraly ótinish ıelerine qosymsha aqparat beriledi», – deıdi Sh.Qadyrova.
