Atap aıtqanda, birinshi kezeńde jumysyn bastaǵan nysandar: hımııalyq tazalaý, kir jýý oryndary, kilemderdi tazalaý ortalyqtary, atele, kıim men aıaq kıim jóndeý, turmystyq tehnıka jóndeý ortalyqtary, avtojýý oryndary, shınomontaj, maı aýystyrý ortalyqtary, tehnıkalyq qyzmet kórsetý stansııalary, tokarlyq, dánekerleý jáne jıhaz sehtary, sulýlyq salondary jáne shashtarazdar,turmystyq tehnıkany onlaın jetkizý rejıminde satý boıynsha saýda úıleri men dúkender bar.
Sondaı-aq kóshetterdi, pestısıdterdi, tyńaıtqyshtardy jáne baý-baqsha taýarlaryn satatyn dúkender, júk avtokóligine, aýyl sharýashylyǵy jáne qurylys tehnıkasyna arnalǵan avtobólshekterdi, shınalardy satý boıynsha dúkender men qoımalar, optıka salondary, avtosalondar men mıkro-qarjy uıymdary, lombardtar jáne aıyrbastaý pýnktteri jumysyn qaıta bastady.
Ekinshi kezeń boıynsha 4 mamyrdan bastap aqparattyq-kommýnıkasııalyq tehnologııalar kompanııalary, 500 sharshy metrge deıingi barlyq baǵyttaǵy dúkender, fotosalondar, medısınalyq ortalyqtar, stomatologııalyq klınıkalar, jarnama agenttikteri, kóshelerdegi sport alańdary, jeke kabınalary bar monshalar, úı janýarlary men gúl satatyn dúkender, jyljymaıtyn múlik agenttikteri iske qosyldy.
Búgingi tańda qalada jalpy sany 6 651 nysan qalypty jumys isteı bastady. Ol jerlerde 136 259 adam eńbek etýde.
Shymkent qalalyq kásipkerlik jáne ındýstrıaldy-ınnnovasııalyq damý basqarmasy barlyq nysandarda sanıtarlyq-epıdemıologııalyq talaptardy qatań saqtaýdy eskertti.
Sonymen qatar, barlyq nysandarda ótkir respıratorlyq juqpaly aýrýlar belgileri bar qyzmetkerlerdiń jumysqa shyqpaýy, bólmelerge júıeli túrde dezınfeksııa júrgizý, qoldy óńdeý úshin sanıtaızerler ornatylýy, qyzmetkerler men kelýshilerdiń betperdelik rejımdi ustanýy eskertildi.
Mekeme aýmaǵynda 5 adamnan artyq jınalmaýy, tólemdi qolma-qol aqshadan tys onlaın arqyly tóleý múmkindigin usynýy talap etilip, saqtyq sharalary basty nazarda bolýy kerektigi aıtyldy.
Aıta ketsek, iske qosylǵan nysandarda jumys ýaqyty kúndelikti saǵat 10.00 - 18.00 aralyǵynda júrgizilmek.
Shymkent
