Bul joly da Prezıdent qara orman halyqty tolǵandyrǵan kóp máselelerdi qaýzady. «Abaı óziniń «tolyq adam» tujyrymyn mıras etse, ál-Farabı «baqytqa jetý jolyndaǵy qaıyrymdy qoǵam» qaǵıdasyn ósıet etip qaldyrdy. Uly oıshyldardyń ádildik pen izgilik jónindegi ustanymy barshaǵa belgili. Meniń «Halyq únine qulaq asatyn memleket» atty tujyrymdamam osy qaǵıdalarmen úndesedi», deıdi Memleket basshysy.
Meniń uǵymymda ulylardy ulyqtaý, olardyń eńbegi men esimin jańǵyrtý urpaq úshin ónegeli óris bolýǵa tıis. Ál-Farabı, Abaı toılarynyń bereri de, bederi de sol ulylyqqa jaqyndaý.
Bul toılardyń Abaısha aıtqanda, «bosqa mal shashpaq emes», órkenıettiń órine bastar ulaǵatymen máńgi este qalǵany abzal. Sonaý bir jyly ýkraınnyń uly aqyny Taras Shevchenkonyń kúnderine qatysqanym bar. Kanevtegi Taras jerlengen bıikte myńdaǵan halyqty kórdim. Qara tasty aıalap, minájat etken eldi kórdim. Jurttyń ulylyqqa taǵzym etip, shyn mahabbatpen jarysa Taras jyrlaryn oqyǵanyna tebirendim. Sonda turyp: «Shirkin, bizdiń Abaıdyń Jıdebaıy qazaq balasy tabynyp barar, saǵynyp barar orynǵa aınalsa ǵoı», dep armandaǵan sátim eske túsip otyr.
Abaı, ál-Farabı – máńgilik ónege. Adamzat balasy aqyl-oı armanyna túsken mynaý almaǵaıyp dúnıede bul esimder eki juldyz sekildi jarqyraı beredi.
Urpaqty ulylyqtyń ulaǵatyn sezine alardaı tárbıelesek, qasıetti qazaq jurtynyń da baq-talaıy janbaq. Dańǵazalyq pen bos maqtannyń ýaqyty ótkenin osy maqalanyń ón boıynan baıqadym. Toı ótkizýdiń de jańa formalaryn izdeý kerek shyǵar.
El basshysy parasat bıiginen oı tolǵapty. Júrekke jeter qarapaıym qaǵıda.
Ǵalym JAILYBAI,
aqyn, Qazaqstannyń eńbek sińirgen qaıratkeri
