«Qazirge deıin elimizde koronavırýs juqtyrǵan 4298 naýqas tirkeldi. Naýqastardyń jartysy Almaty men Nur-Sultan qalalarynda anyqtaldy. Jalpy 1279 naýqas jazylyp, úılerine shyǵarylsa, stasıonarda 2897 syrqat em alýda. Al olardyń 85%-nyń jaǵdaıy qalypty, 14%-y ortasha qalypty bolsa, 25 syrqat aýyr halde. 6 naýqastyń jaǵdaıy óte aýyr, 7 syrqat jasandy demalý apparatyna qosylǵan. Vırýs taralǵannan beri Qazaqstanda 30 naýqas kóz jumdy. Naýqastarmen baılanysta bolǵan 59 204 adam anyqtalyp, olardyń 98%-y oqshaýlandy», dedi Tımýr Sultanǵazıev.
Komıtet tóraǵasy elimizde epıdemııalyq jaǵdaıdyń turaqtanyp, indettiń taralý deńgeıi tómendegenin jetkizdi. «О́tken táýlikte 156 jańa jaǵdaı tirkeldi. О́sý deńgeıinde aıtarlyqtaı tómendeý úrdisi baıqalady. Atap aıtqanda, sáýir aıynda ortasha ósim 15-16% bolsa, sońǵy eki aptada ol 7%-dan asqan joq. Al sońǵy 3 kúnde indettiń taralý deńgeıi – 4%. Munyń barlyǵy Memlekettik komıssııa men bas sanıtarlyq dárigerdiń baqylaýynda. Karantındi joıýdyń naqty ólshemderi bar. Buǵan qol jetkizý úshin halyq Densaýlyq saqtaý mınıstrligi usynǵan sharalardy oryndaýy kerek», dedi ol.
Qazirge deıin anyqtalǵan naýqastardyń jartysynan kóbi elimizde jappaı testileý júrgizýdiń nátıjesinde anyqtalǵan. Osyny aıtqan Tımýr Sultanǵazıev karantın erejeleri durys saqtalmasa indet qaıtadan lap berýi de múmkin ekenin aıtty. «Búgingi kúnge deıin tirkelgen naýqastardyń 57%-y skrınıng kezinde, 36%-y medısınalyq kómekke júginý barysynda anyqtalsa, al 7,2%-y tasymaldaýshylar arqyly juqtyrǵan. Bul jańa vırýs. Ekinshi tolqynnyń paıda bolatyn-bolmaıtynyna naqty jaýap berý óte qıyn. Biz keıbir memleketterde aýrýdyń qaıta bas kótergenin kórip otyrmyz. Sondyqtan karantın erejeleri qatań saqtalýy kerek», dedi Taýarlar men kórsetiletin qyzmetterdiń sapasy men qaýipsizdigin baqylaý komıtetiniń tóraǵasy.
Sońǵy ýaqytta áleýmettik jelilerde halyqty jappaı vaksınasııalaý týraly fotosýretter men aýdıo habarlamalar taraýda. Nurshaı Ázimbaeva bul aqparattardyń jalǵan ekenin aıtty. «Osyǵan baılanysty men barlyq azamatty áleýmettik jelilerdegi beıresmı aqparattarǵa senbeýge jáne taratpaýǵa, tek resmı aqparat kózderin negiz etýge shaqyramyn. Jalǵan aqparat taratqan adamdardyń jaýapkershilikke tartylatynyn taǵy bir ret eske salǵym keledi», dedi ol.
Vırýs juqtyrǵan naýqastarǵa qandaı em-dom jasalyp jatqanyn habarlaǵan Arnur Nurtaev: «Búginde Qazaqstanda koronavırýsty emdeý protokolyna sáıkes enterovırýsty preparattardan bastap antıbıotıkterge deıin birqatar preparat qoldanylady. Olar óz nátıjesin kórsetti. Atalǵan dári-dármekterdiń barlyǵy Dúnıejúzilik densaýlyq saqtaý uıymynyń usynysymen alynǵan. Apta saıyn jańa dári-dármek qosylyp, keıbiri qoldanystan alynyp jatady», dedi.
Al Berik Shárip Úndistannan alynatyn vaksınalardyń sapasyna toqtaldy. «Úndistannan mindetti túrde qoldanatyn úsh vaksına alamyz. Onyń bireýi ADS-M vaksınasy, ekinshisi qyzylshanyń aldyn alýǵa qoldanylatyn vaksına, al úshinshisi týberkýlezge qarsy vaksına. Úsh vaksına da Dúnıejúzilik densaýlyq saqtaý uıymynyń aldyn ala tekserisinen ótken. О́ziniń arnaıy sertıfıkaty bar jáne álemniń 70 memleketinde qoldanylady. Olardyń nátıjeliligi men qaýipsizdigi dáleldengen», dedi ol.
