Múgedekterdiń ortalyqtandyrylǵan qorynyń málimeti boıynsha, Aqmola oblysynda barlyq toptaǵy 29 myńnan asa múmkindigi shekteýli azamat bar. Olardy qajetti qurylǵylar jáne ońaltý qyzmetterimen qamtamasyz etý úshin oblystyq bıýdjetten bıyl 467 mıllıon teńge bólingen. «Invataksı» qyzmetine 49,7 mıllıon teńge qarastyrylǵan. Alaıda, eń basty máseleniń biri – kedergisiz orta qalyptastyrý.
–Jospar boıynsha áleýmettik mańyzy zor 1672 nysannyń múmkindigi shekteýli azamattar úshin qoljetimdiligin qamtamasyz etý qajet. Onyń 222-si qaladaǵy nysan. Olardyń barlyǵy búginde qoljetimdi. Kireberisten bastap, ishki bólmelerine deıin bul nysandarda barlyq jaǵdaı jasalýy tıis. Sanıtarlyq bólmelerine deıin bolýy qajet. Sońǵy jyldary buǵan qosymsha 335 nysan qosyldy. Sóıtip, 2 myń nysan múgedekter úshin qoljetimdi bolýy tıis. Alaıda, qazirde olardyń sapasyna úlken mán berilýde,–deıdi oblystyq jumyspen qamtý jáne áleýmettik baǵdarlamalardy úılestirý basqarmasy basshysynyń orynbasary Altyn Aqbarova.
Sońǵy jyldary oblys boıynsha kóptegen nysandar múmkindigi shekteýli azamattarǵa qoljetimdi bolýy úshin pandýstar ornatty. Alaıda, olardyń sapasy syn kótermeıdi. Sondyqtan, «Qoljetimdiliktiń ınteraktıvti kartasyna» engen nysandar jyl saıyn qaıta túzetýler engizýge májbúr. Onyń aldyn alý úshin zańnamalyq baza myqty bolýy qajet.
–Búgingi kúnge deıin ne jasaldy desek, áleýmettik qyzmet kórsetýdiń biryńǵaı respýblıkalyq portaly qurylyp, iske qosylady. Sonyń arqasynda ár azamat ózine qajet qyzmetke tapsyrys bere alady. Ázirge 20-25 qyzmet túrleri qoljetimdi. Múgedekterdi qorǵaý týraly zańyna birqatar túzetýler engizilmek. Bul úrdiske múmkindigi shekteýli azamattar da belsendi qatysýy kerek dep sanaımyn,–deıdi «Shans» múgedekter qoǵamynyń tóraǵasy Vasılıı Shımanskıı.
Bıyl múmkindigi shekteýli azamattardy ońaltý sharalaryna respýblıkalyq bıýdjetten 928, al, oblystyq qazynadan 467 mıllıon teńge bólingen bolatyn. Múgedekter arbasy men qajetti qurylǵylar, sanatorlyq-kýrorttyq emdelý men protezdeýge respýblıkalyq bıýdjetten qosymsha 461 mıllıon teńge qarastyrylyp otyr.
Osylaısha múmkindigi shekteýli azamattardyń barlyq máseleleri turaqty nazarda bolyp otyr. Bul da izgi qoǵamnyń izetti sharapaty.
