Aımaqtar • 07 Mamyr, 2020

Aqmoladaǵy ilkimdi ister

5 ret kórsetildi

Kókshetaý áýejaıy jańasha túrlenedi. Aqmola oblysynyń ákimi Ermek Marjyqpaev nysannyń jóndeý jumysynyń barysymen tanysyp, mekeme basshylyǵyna birqatar mindet júktedi. Sondaı-aq, óńir basshysy Zerendi aýdanynyń kóktemgi egis naýqanyna ázirligin baǵamdap, Aqkól, Ortaq, Qyzyltań aýyldarynyń ınjenerlik jelileri men áleýmettik nysandaryna jóndeý jumystaryn júrgizý týraly tapsyrma berdi.

Qazaqstan men Reseıdiń aımaqaralyq yntymaqtastyq forýmyna ázirlik aıasynda Kókshetaýdyń áýe qaqpasy da túrlenedi. Oblys ákimi qala men áýejaı arasyndaǵy jol boıyn kógaldandyrý, áýejaı aýmaǵyn abattandyrýǵa arnalǵan jobalardyń júzege asyrylý barysymen tanysty. Bul maqsattarǵa jalpy kólemi 13 mln teńge qarjy bólingen. Sonymen qatar, áýejaı aýmaǵynda 1978 jyly salynǵan qonaq úıdi qaıta qalpyna keltirý qolǵa alynǵan. Jóndeý jumystaryna 150 mln teńge shamasynda qarjy bólingen.

Áýejaıdan taıaqtastam jerdegi Aqkól aýyly jyl sanap kórkeıip keledi. Kezekte turǵan adamdarǵa arnap 180 jer telimi ázirlenipti. Joba quny 115 mln. teńge. «Bereket - 2050» sharýa qojalyǵy ótken jyly gektarynan 20 sentnerden astam dán jıyp, ozyq tehnologııalardyń tıimdiligin kórsetken. 4700 gektar egistik aýmaqta sharýalar eýropalyq agrarlyq tásilderdi qoldanyp keledi. Olar óz qyzmetin ártaraptandyryp, 9 túrli daqyl egýge jáne mal sharýashylyǵymen aınalysýǵa ynta bildirip otyr.

–Bizdegi astyq tuqymy joǵary surypty. Reseıden bıdaıdyń elıtaly suryptaryn aldyrdyq. Sonymen qatar, arpa, suly, burshaq, soıa tuqymdarynda. Bıyl 9 túrli dándi daqyldardy egýdi josparlap otyrmyz,–deıdi «Bereket-2050» seriktestiginiń dırektory Iаkov Savchenko.

Oblys ákimi Ortaq aýylynyń jolyna nazar aýdardy. Tozyǵy jetken eski súrleýdi jańǵyrtýǵa 50 mln teńge qarjy bólinedi. Jalpy, aýdanda 14 baǵytta jol jóndeý jumystary atqarylýda.

–Biz Shaǵalaly-Prırechnoe baǵytyndaǵy joldy, Uıaly aýylyna aparatyn joldy jóndeýdemiz. Vıktorovka aýylynda sý qubyry tartylýda. Keıin jol jóndeý jumystary bastalady. Aýdan ortalyǵynda da jóndeý jumystary josparlanǵan,–deıdi Zerendi aýdanynyń ákimi Baýyrjan Ǵaısa.

Aýyl turǵyndary ortalyqtandyrylǵan aýyz sý júıesine 70 shaqty úıdiń qosylmaǵynyn jetkizdi. Bul olqylyqty joıýǵa 10 mln. teńge bólinedi. Aýyldyń ortalyq kóshesin jaryqtandyrý, kórshiles Qyzyltań aýylynyń áleýmettik nysandaryna jóndeý jumystaryn júrgizýge de 14 mln teńge qarastyrylmaq. Ortaq aýylynyń turǵyndary da qol qýsyryp qarap otyrmaı, aýyl meshitine jóndeý júrgizip, ıesiz qalǵan eski ǵımarattardy qalpyna keltirmek.  

 

Sońǵy jańalyqtar

Rýbl baǵamy quldyrady

Ekonomıka • Keshe

Uqsas jańalyqtar