Áleýmettik nysandar qurylysy qatarynda bıyl 100 mektepke jóndeý jumystary júrgiziledi. Qyzyljardyń «Bereke» shaǵyn aýdanynda osy zamanǵy talaptarǵa tolyq saı keletin emhana salynbaqshy. Mádenıet salasynyń 32 nysany kúrdeli jáne aǵymdyq jóndeýlerden ótkiziledi.
Osyǵan baılanysty Qumar Irgebaıuly erekshe pikir bildirdi. «Buryn biz ańǵaradaı mádenıet úılerin turǵyzyp, olardy tek konsert kórýge, jınalys ótkizýge ǵana qoldanyp keldik. Basqa ýaqyttarda tek oryndyqtardan turatyn olar jaryq, jylý, kúzet shyǵyndaryn bosqa shyǵaryp, qańyrap turatyn. Mine, osyndaı qurylystardy qazir sporttyq sharalar ótkizýge de beıimdeý kerek. Olardyń ishine trenajerler ornatyp, fıtnes klýbtar uıymdastyrýǵa bolady. Sonda mádenıet úıleri tıimdi paıdalynatyn bolady», dedi ol.
Sonymen birge bıyl 777 shaqyrymdyq joldar jóndeletindigi belgili boldy. 76 eldimekenge taza aýyz sý jetkizý máselesi sheshiledi eken. Osy jumystardyń bári jańadan 6400 jumys oryndaryn ashady.
Sonymen birge nysandar qurylysynyń jobasyn iske asyrý konkýrsyna túsetin úmitkerlerge talaptyń kúsheıetinin jetkizdi. Árbir kompanııa ózderi alystan tartatyn jumyskerlerine 85 myń teńge qonystaný qarajatyn tóleýge mindetteletin bolǵan. Sonymen birge ákim sýbmerdigerlik degen bolmaıtynyn atap aıtty. «Konkýrsty jeńip alǵannan keıin árbir kompanııa 3 kúnniń ishinde júrgiziletin jumystyń syzbasyn jasaýy kerek. Al onyń oryndalýyn halyq arasynan shaqyrylǵan belsendi azamattar, jýrnalıster men blogerlerden, qoǵamdyq uıymdar ókilderinen quralatyn komıssııa qadaǵalap otyrady. Syzbadan aýytqyǵan jaǵdaıda biz kelisimshartty birden územiz», dedi Q.Aqsaqalov.
Sonymen birge ákim qurylysqa 90 paıyzdyq otandyq materıaldar qoldanýy kerektigin aıtty. Sonyń ishinde oblys aýmaǵyndaǵy qurylys materıaldaryn óndiretin kásiporyndardyń ónimderi qoldanylmaq. «Alaıda, osy talapty paıdalanyp, kásiporyndar óz ónimderiniń baǵasyn ósirip jibermeýi qadaǵalansyn», dedi ákim.
Sóıtip, Teristikte bıyl qurylys qarqyndy júrgizilmek. Karantın rejimin saqtaýda oblys aldyńǵy qatardaǵy aımaqtar qatarynan tabylyp, jaman indettiń óristeýine jol bermegen edi. Endi qurylystardy da sol qarqynmen atqarsa quba-qup.
Soltústik Qazaqstan oblysy
