Memleketter basshylary halyqty evakýasııalaý jáne áleýmettik qoldaý, ınjenerlik jáne kólik ınfraqurylymyn qaıta qalpyna keltirý sekildi shuǵyl atqarylýy tıis birqatar mindetterdi sheshý barysyndaǵy taraptardyń tyǵyz ári úılesimdi jumysyna oń baǵa berdi.
О́zbekstan basshysy baýyrlas halyqtar arasyndaǵy qatynas dostyq jáne tatý kórshilik dástúrge negizdelgenin aıtyp, kez-kelgen qıyndyqty birlesip eńserýge bolatynyn atap ótti. Shavkat Mırzııoev О́zbekstan tarapynyń jan-jaqty qoldaý kórsetetinin, onyń ishinde, erkin aqparat almasyp, bógetti qaıta qalpyna keltirý kezinde Qazaqstannyń múddesi men halyqaralyq quqyq qaǵıdattaryn eskerip, ashyq jumys júrgizýge daıyn ekenin jetkizdi.
Qasym-Jomart Toqaev Shavkat Mırzııoevke osyndaı qysyltaıań shaqta О́zbekstannyń kórsetken qoldaýy men kómegi úshin rızashylyǵyn bildirdi.
– Biz bir ózenniń boıynda otyrmyz. О́zara senim men ashyqtyq negizinde ǵana sý resýrstaryn ádil, tıimdi paıdalanýǵa qol jetkizemiz jáne transshekaralyq sıpattaǵy qaýip pen syn-qaterlerdiń aldyn alýǵa múmkindigimiz bolady, – dedi Qazaqstan Prezıdenti.
Taraptar transshekaralyq ózenderdiń resýrstaryn birlesip basqarý jáne paıdalaný tetikterin odan ári jetildirý týraly kelisimge keldi. Osy oraıda eki el úkimetterine turaqty ári joǵary deńgeıde jumys isteıtin arnaıy top qurý máselesin oılastyrý júkteldi.
Áńgime sońynda taraptar birin-biri Uly Otan soǵysyndaǵy Jeńistiń 75 jyldyǵymen quttyqtady.
Qasym-Jomart Toqaev pen Shavkat Mırzııoev bul merekege erekshe mán berip, qurmetpen qaraý kerek ekenin atap ótip, barlyq ardagerler men tyl eńbekkerlerine shyn júrekten zor densaýlyq pen uzaq ǵumyr, al, baýyrlas Qazaqstan men О́zbekstan halyqtaryna amandyq pen órkendeý tiledi.
Telefon arqyly sóılesýge ózbek tarapy bastamashy boldy.
