Tasqyn sýdan zardap shekkenderge kómek retinde oblystyń aýdandarynan bólek, Nur-Sultan, Almaty, Shymkent qalalarynan, Jambyl, Qyzylorda, Pavlodar oblystarynan túrli qoǵamdyq uıymdar men qaıyrymdylyq qorlarynan jáne jekelegen kásipkerlerden gýmanıtarlyq kómekter jetkizildi. Onyń ishinde azyq-túlik, jeke bas gıgıenasyna arnalǵan zattar jáne kıim-keshekter de bar. «Qazirgi tańda Maqtaaral jáne Jetisaı aýdandarynda 10 evakýsııalyq beket jumys istep tur. Munda 3700-den astam adam ornalasqan. Qoımaǵa jınalǵan taýarlar suranysqa baılanysty sol pýnktterdegi jáne týystarynyń úıin panalap jatqan azamattarǵa júıelengen tártipte taratylýda», deıdi Nur Otan partııasy oblystyq fılıaly tóraǵasynyń birinshi orynbasary, tótenshe jaǵdaılar boıynsha gýmanıtarlyq kómekterdi úılestirýshi Beısen Tájibaev.
Gýmanıtarlyq kómektiń kóptep kelýine baılanysty ekinshi qoıma belgilenip, azyq-túlikter sonda jınaqtalýda. Qoımaǵa jaýapty, oblystyq ardagerler keńesi tóraǵasynyń birinshi orynbasary Kenjehan Tólebaevtyń aıtýynsha, gýmanıtarlyq kómekter aldaǵy eki-úsh aıǵa jetýi tıis. Pýnktterden bólek, jekelegen týystarynyń úıinde jatqan turǵyndar úshin Atakent eldi mekeninde eki taratý oryndary jumys isteýde.
Túrkistan oblysy
