Sport • 11 Mamyr, 2020

Úzdik ondyqta

12 retkórsetildi

Koronavırýstyń saldarynan bul kúnderi barlyq sporttyq sharalardyń toqtatylǵany belgili. Solardyń qatarynda dzıýdo da bar. Eń bastysy, kúrestiń bul túri boıynsha balýandardyń osyǵan deıin jıǵan upaılary tolyqtaı saqtalyp qalady. Endi pandemııaǵa baılanysty osy úzilisti paıdalana otyryp, álemdik reıtıngke taǵy bir kóz júgirtý artyq etpeıdi dep oılaımyz. Sol arqyly qaı memleket ókilderiniń qarqyny kúshti nemese kimderdiń tegeýrini baıaý ekenin anyq baıqaýǵa bolady.

Áńgimemizdiń «álqısasyn» óz óren­deri­mizden bastaıyq. Aıdyn Smaǵulov jetekshilik etetin Qazaqstannyń erler quramasy sapyndaǵy eki qandasymyz ǵana qazirgi kezde álemdik reıtıngte «TOP-10» dzıýdoshynyń qataryna enip otyr. Olar – Eldos Smetov pen Ǵusman Qyrǵyzbaev. Bul balýandardyń ekeýi de 60 kılo salmaq dárejesinde óner kórsetedi. Qazirgi kezde Eldos úshinshi, al Ǵusman altynshy orynda ornalasqan. Alǵashqysy 5018 upaıdy, ekinshisi 3932 upaıdy enshilep otyr.

66 kılo salmaq dárejesindegi jerles­terimiz de aıaqalysy jaqsy. Qorjynynda 3135 upaıy bar Erlan Serikjanov 11 oryn­da tursa, 2179 upaıdy ıemdengen Eldos Jumahanov 20 satyǵa jaıǵasty. Osy oraıda, Olımpııa oıyndarynda bir salmaqta bir memleketten bir ǵana balýan kúsh synasýǵa quqyly ekenin eskergen jón. Sondyqtan da joǵaryda esimderi atalǵan tórt dzıýdoshynyń arasynan álemdik reıtıngte joǵary turǵan eki sportshy ǵana Tokıoǵa sapar shegedi. 

90 kılo salmaqtaǵy Islam Bozbaevtyń da qarqyny táýir. Olımpııa oıyndaryna qatysýǵa múmkindik beretin lısenzııalyq dodalarda daralana almasa da ol áıteýir qalyń toptyń bel ortasynda júrip, osy kúnge deıin 2146 upaıdy qorjynyna salyp úlgerdi. Búgingi tańda Bozbaev 19-oryndy ıelenýde.

Qalǵan salmaq dárejelerinde kúsh synasatyn jigitterimiz senim údesinen shyǵa almaı júrgeni jasyryn emes. Máselen, osyǵan deıin asqan sheberlik tanytyp, birqatar baıraqty básekede jeńis tuǵyryna kóterilgen 81 kılo sal­maqtaǵy Dıdar Hamza qazirgi kezde nebári 32-oryndy qanaǵat tutýda. Onyń 1720 upaıy bar. Biraz ýaqyttan beri 73 kılo salmaqta saıysqa túsip júrgen Jansaı Smaǵulov endi ǵana eńse tiktegendeı. Ústimizdegi jyldyń aqpan aıynda Parıjde ótken týrnırde kúmis medaldi ıelengen soń qandasymyz 24-orynǵa kóterildi – enshisinde 2454 upaı bar.

Al alyptarymyzdyń jaǵdaıy óte múshkil. Atap aıtsaq, elishilik jarys­tar­daǵy 100 kılo salmaqtyń úzdigi  Aıbek Se­rikbaev nebári 51-oryndy qanaǵat tutýda. +100 kılo salmaqta senim artqan serkemiz Erasyl Qajybaev 38-satyǵa jaıǵasqan.

О́zge memleket ókilderiniń nátıjesin saralaıtyn bolsaq, búgingi tańda japondardyń qarqyny óte kúshti ekeni baıqalady. Kúnshyǵys eliniń 12 óreni «TOP-10» dzıýdoshynyń sanatynda. Árıne, oǵan tańdanýǵa bolmas. О́ıtkeni, bul kúres túriniń otany – Japonııa. Olar ózderi oılap tapqan ónerde árkez aldaryna jan salmaýǵa tyrysady.

Grýzııanyń da tegeýrini qýantarlyq. Qap taýynyń alty qyrany joǵaryda atalǵan mejeden kórinip otyr. Sondaı-aq Nıderland pen Reseıdiń – 5, Izraıl men Ázerbaıjannyń – 4, Ispanııa, Ońtústik Koreıa, Mońǵolııa, Brazılııa, Kanada, Túrkııanyń – 3, Germanııa men Qazaqstannyń – 2, О́zbekstan, Taıpeı, Ita­lııa, Kosovo, Shvesııa, Belgııa, Ser­bııa, Kýba, Majarstan, Portýgalııa, Che­hııa jáne Ýkraınanyń 1 ókili álemdegi «TOP-10» dzıýdoshynyń qataryna enip otyr.

Mine, qazirgi kezdegi erlerdiń álemdik reıtıngindegi jaǵdaı osyndaı.

 

Álemdik reıtıngtegi eń úzdik dzıýdoshylardyń alǵashqy úshtigi

60 kılo: 1. Rıýdzıý Nagaıama (Japonııa), 2. Naohısa Takato (Japonııa), 3. Eldos Smetov (Qazaqstan).

66 kılo: 1. Manýel Lombardo (Italııa), 2. Hoshıro Marýıamo (Japonııa), 3. Hıfýmı Abbe (Japonııa).

73 kılo: 1. Soıshı Hashımoto (Ja­ponııa), 2. Rýstam Orýdjev (Ázerbaıjan), 3. Tohar Býtbýl (Izraıl).

81 kılo: 1. Mattıas Kaas (Belgııa), 2. Sa­gı Mýkı (Izraıl), 3. Domınık Res­sel (Germanııa).

90 kılo: 1. Nıkoloz Sherzadadıshvılı (Ispanııa), 2. Nemanııa Maıdov (Serbııa), 3. Noel van ’t End (Nıderland).

100 kılo: 1. Maıkl Korrel (Nıder­land), 2. Cho Gýham (Ońtústik Koreıa), 3. Varlam Lıpartelıanı (Grýzııa).  

+100 kılo: 1. Lýash Krpalek (Chehııa), 2. Hı­saıýshı Harasava (Japonııa), 3. Gýram Týshıshvılı (Grýzııa).

Sońǵy jańalyqtar

Áke rýhynan qýat alǵan qaısar jan

Rýhanııat • Búgin, 11:54

Abylaıhannyń aq joly

Aımaqtar • Búgin, 10:05

Aqmolada qaıyrymdy jandar kóp

Aımaqtar • Búgin, 09:31

Uqsas jańalyqtar