Bas qalada karantın kezindegi talaptar jeńildegenimen, turǵyndarǵa erkinsýge áli erte. Búginde elorda da koronavırýs ınfeksııasynyń 1074 jaǵdaıy tirkeldi. 1134 naýqas stasıonarda jatyr. 404 adam emdelip shyqsa, indetten 3 adam kóz jumdy.
– Qalanyń tynys-tirshiligin qamtamasyz etetin birqatar kásiporynnyń ǵana qyzmetine ruqsat etiledi. Qala shekarasyndaǵy blok-beketter de jumysyn jalǵastyrady. Karantın kezinde 98 obekti jabylǵan bolatyn. Endi onyń 66-sy ashylmaq. Qalǵandary aldaǵy ýaqytta iske qosylady, – deıdi Nur-Sultan qalasy ákiminiń orynbasary Baqtııar Máken.
Spıkerdiń aıtýynsha, saıabaqtarǵa, alańdarǵa jáne oıyn-saýyq obektileri joq jaǵalaýlarǵa birlesip 3 adamǵa deıin nemese betperde kıip otbasy múshelerimen barýǵa bolady. Sondaı-aq kúsheıtilgen sanıtarlyq-dezınfeksııalyq rejimdi saqtaı otyryp, shaǵyn saýda ortalyqtary jumysyn jalǵastyra bermek. Nur-Sultanǵa kirý qyzmetti qaıta bastaýǵa ruqsat etilgen kásiporyndarda jumys isteıtin mamandar úshin ashyq. Aqmola, Pavlodar oblystarynyń ákimderi karantın aımaǵynda jumys isteıtin jaqyn aýdan azamattarynyń tizimin qalyptastyrady jáne «Sergek – Blok-beket» júıesine engizý úshin ákimdiktiń jedel shtabyna usynady.
– Mekemede bir mezgilde birneshe adam bolmaýy kerek jáne olardyń barlyǵy betperde taqqany jón. Qyzmetker men klıenttiń arasy 2 metrden kem bolmaýy tıis. Sonymen qatar personal men klıenttiń tikeleı baılanysyn barynsha shekteý kerek. Turmystyq tehnıka satatyn iri dúkender men baý-baqsha maýsymyna qatysty kerek-jaraq dúkenderinde de medısınalyq pýnktterdiń bolýy mindetti, medısınalyq qyzmetkerlerdi ár aýysym saıyn tekserip otyrýy shart. Klıent pen qyzmetker arasynda araqashyqtyq saqtalýy kerek, – deıdi B.Máken.
Baspasóz máslıhaty barysynda memlekettik áleýmettik sharalarmen qatar, Elbasynyń bastamasymen bastalǵan «Biz birgemiz!» aksııasynyń aıasynda atqarylǵan jumystar da aıtyldy. Atap aıtsaq, áleýmettik osal topqa jatatyn 42500 otbasyna Nur Otan partııasynan 50 myń teńgeden áleýmettik kómek berilgen. Bıznesmender men qaıyrymdy azamattardyń kúshimen 17 myń tonna azyq-túlik jıyntyǵy tapsyrylyp, oǵan qalalyq shtabtan 500 erikti jumyldyrylǵan.
