Biz es bilip, etek jıǵan kezimiz de aýylymyzda «Qudaı jaqsy apa» deıtin keıýana boldy. Jaryqtyq týysqa tapshy adam edi. Júzinen meıirim tógilip turatyn. Tula boıynda záredeı pańdyǵy joq, kógershin júrekti jan edi. Qashan kórseń «Qudaı jaqsy, Qudaı jaqsy» dep úzdiksiz kúbirleıdi de júredi. Qazir oılap otyrsam jaryqtyqtyń zikiri eken ǵoı. Osy sózine bolsa aýyl ol kisini «Qudaı jaqsy apa» deıtin.
Soǵys jyldary Qudaı jaqsy apanyń jalǵyz ulyn maıdanǵa alyp ketipti. Aýyl sovettiń bastyǵy aqsaq Múkán deıtin adam «bireýdiń jalǵyz uly edi, ózi hat-shot ta tanymaıdy, oryssha bilmeıdi...» dep qansha ara túskenimen aýdannan kelgen komıssar «ondaı bolsa onyń ornyna óziń júr» degen soń úni óshken. Sóıtip aýyl shetindegi buıra qumnan asyp kórmegen jigitti soǵysqa áketken.
Eldiń úlkenderi jınalyp kelip keıýanaǵa kóńil aıtpaı ma «Apa, jalǵyz ulyń jaýǵa ketti, endigi kúniń ne bolar eken...» dep. Sonda apamyz «Qudaı jaqsy emes pe, ulym aman-esen oralady, jaqsy Qudaı meni nege jalǵyz qaldyrsyn, Qudaı jaqsy, Qudaı jaqsy...» dep kúbirlep otyra bergen. Aqsaqaldar basyn shaıqap keri qaıtqan.
Aıtqandaı, arada jyl ótpeı jatyp, ıaǵnı soǵys bitpeı jatyp apanyń uly oshaǵyna aman-esen oralǵan. Maıdanǵa kirgen bette jaralanǵan ony dárigerler «soǵysqa jaramaıdy, tylǵa qaıtarylsyn» anyqtama berip sanchastan shyǵarǵan da, oń men solyn ajyratpaıtyn beıbaqty bir sanıtarka jetektep alyp sonaý maıdan dalasynan aýylǵa ákelip, selsovetke tapsyryp «qabyldap aldym» degen qaǵazǵa qol qoıdyryp keri qaıtqan.
El-jurt «Oıpyrym-aı, jerdiń jyrtyǵyn jamap, jylannyń aıaǵyn kórgen ne bir atpal azamattar qaza taýyp, qaptap qara qaǵaz kelgende, oń men solyn ajyrataıtyn kempirdiń myna balasy maıdannan qalaı aman oraldy» dep qaıran.
Biraq adamdar Qudaı jaqsy apanyń kúndiz-túni aıtatyn zikiri men Jaratýshyǵa arnap jasaǵan shynaıy duǵasynyń arqasynda uly maıdannan aman oralǵanyn qaıdan bilsin. Erekeń áńgimesin osylaı dep aıaqtady.
Bizdiń aıtpaǵymyz joǵarydaǵy oqıǵada úlken hıkmet bar. Alla Taǵala Qurannyń «Baqara» súresi, 152-aıatynda: «Meni eske alyńdar, Men de senderdi eske alamyn jáne Maǵan shúkirlik etińder de qarsy bolmańdar» deıdi. Iаǵnı, Jaratýshy ózin úzdiksiz zikir etken múmindi jarylqaıdy. Sonyń bir dáleli – Qudaı jaqsy apanyń zikiri.
