Qoǵam • 13 Mamyr, 2020

«Eńbek» baǵdarlamasy shaǵyn biznesti qoldaýǵa baǵyttalǵan

48 retkórsetildi

Búgingi tańda agrarlyq sektordy damytý basymdyqqa ıe bolyp otyr. Bul salanyń el ekonomıkasynyń negizgi draıverine aınalýǵa áleýeti jetedi. Qazaqstanda shaǵyn bıznes sýbektilerin qoldaýdyń mehanızmi jumys isteıdi. Solardyń biri – «Eńbek» nátıjeli jumyspen qamtýdy jáne jappaı kásipkerlikti damytý baǵdarlamasyna qatysýshy kásipkerlerge shaǵyn nesıe berý.

Aýyl sharýashylyǵyn qarjylaı qoldaý qory 2017 jyldan beri «Eńbek» baǵdarlamasy boıynsha kásipkerlerge nesıe berýmen aınalysyp keledi.  Osy jyldar ishinde Aqtóbe oblysyndaǵy kásipkerlerge jalpy somasy 10 mlrd teńge bolatyn úsh myń nesıe berilgen eken. Tórt myńnan astam adam jumyspen qamtylǵan.

««Eńbek» baǵdarlamasynyń aıasynda mal sharýashylyǵyn, ósimdik sharýashylyǵyn, kásipkerlik qyzmetti damytýǵa, sondaı-aq, aýyl sharýashylyǵy ónimderin qaıta óńdeý men saqtaýǵa baǵyttalǵan nesıe ónimderimizdi usynamyz. Jyldyq syıaqy mólsheri 6%, tıimdi jyldyq syıaqy mólsheri 6,7%-ten aspaıdy. Nesıe somasy qyzmettiń baǵytyna qaraı 4 mln teńgeden 15 mln teńgege deıingi aralyqta bolady. Nesıeniń beriletin merzimi de jobaǵa baılanysty 6,5 jylǵa deıin sozylady», deıdi «Aýyl sharýashylyǵyn qarjylaı qoldaý qory» AQ Aqtóbe fılıalynyń dırektory Gúljanat Erǵazına.

Baǵdarlama shaǵyn qojalyqtar men fermerlik sharýashylyqtardy jáne jeke kásipkerlerdi qoldaýǵa baǵyttalǵan. Kóp balaly otbasylar men az qamtamasyz etilgen otbasylardan shyqqan azamattarǵa nesıe 4 prosentpen beriledi.

«Ortasha eseptegende fılıal jylyna myńnan astam nesıe beredi. Onyń shamamen 60%-ti startap-jobalardy qarjylandyrýǵa baǵyttalady. Iаǵnı, qarastyrylǵan qarjynyń negizgi bóligi jańa jumys oryndary men jańa shaǵyn bıznes nysandaryn ashýǵa jumsalady. Berilgen nesıelerge jasalǵan taldaýlarǵa sáıkes, aýyldardaǵy mal sharýashylyǵymen aınalysatyndardyń úlesi basym bolady eken», - deıdi Gúljanat Erǵazına.

«Eńbek» baǵdarlamasynyń tıimdiligine kóz jetkizgenderdiń biri «Bekbolat» sharýa qojalyǵynyń basshysy Musabek Sultanov. Ol shaǵyn bızneske jańadan kelgen adam emes. Ol 1997-jyldan beri mal sharýashylyǵymen aınalysyp keledi. Áıteke bı aýdanyna qarasty Jabasaq aýylynda turatyn fermer birneshe ret nesıe rásimdegen.

2016 jyly ol alǵash ret Aýyl sharýashylyǵyn qarjylaı qoldaý qorynyń Aqtóbe fılıalyna baryp, mal bordaqylaý úshin «Jumyspen qamtý jol kartasy 2020» baǵdarlamasy boıynsha 2 mln teńge nesıe aldy. Ol kezde sharýashylyqta 16 bas qana iri qara bar edi.

«Nesıe iri qara mal satyp alýǵa óte tıimdi sharttarmen berildi.  Bul qarjy malymnyń basyn arttyrýǵa úlken kómek boldy. Qazir sharýashylyǵymda 110 bas sıyr bar. Bizdiń negizgi qyzmetimiz aýyl sharýashylyǵy ónimderin ósirý, daıyndaý, qaıta óńdeý, mal sharýashylyǵy ónimderin satý», - deıdi «Bekbolat» sharýa qojalyǵynyń basshysy Musabek Sultanov.

Byltyr qojalyq basshysy burynǵy alǵan nesıelerin ýaqytynan buryn qaıtaryp tastap, bıyl Qorǵa tehnıka alý úshin taǵy ótinim bergen.

«Men 6 mln teńge nesıe rásimdedim. Oǵan óz qarjymdy qosyp jańa traktor satyp aldym. Qorda jyldam ári saýatty, jaqsy mamandar jumys isteıdi. Endi jarty jylda bir 700 myń teńge tólep turamyn. Osy sáýir aıynda alǵashqy tólemdi jasap qoıdym, kelesi tólemniń ýaqyty qazan aıynda keledi», - deıdi Musabek Qaıyrbekuly.

Sharýashylyqtyń jumysy jaqsy júrip jatyr. Myna alǵan nesıeni de ýaqytynan buryn qaıtaryp tastaıtyn shyǵarmyn, deıdi fermer. Qojalyq basshysynyń taǵy da birqatar jospary bar. Endi mal azyǵyn daıyndaıtyn tehnıkalardy satyp almaq. Atap aıtqanda, shóp shabatyn jáne ony presteıtin aýyl sharýashylyǵy tehnıkalaryn túgendemek. Sondaı-aq, bolashaqta jylqy men qoı ósirýdi qolǵa alyp, sharýashylyǵynyń baǵytyn keńeıtpek.

«Eńbek» baǵdarlamasy boıynsha beriletin nesıeniń tıimdiligi aýyldyqtardy arqalandyrady. Syıaqy mólsherlemesiniń tómendigi, jeńildik kezeńderi, nesıeni óteýdiń ıkemdi kestesi, tıimdi kepildik saıasaty, qarjylandyrý sharttarynyń jeńildigi aýyl bıznesinde jańa sharýashylyqtar qurýǵa jáne keńeıtýge, óndiristiń damyǵan deńgeıine kóterilýge múmkindik beredi.  Bıyl aqtóbelik kásipkerlerge nesıe berý úshin 3 mlrd teńgeden astam qarjy bólý josparlanyp otyr.

Sońǵy jańalyqtar

Abaı murasy Bishkekte talqylandy

Rýhanııat • Búgin, 20:36

«Adal bilim» jobalyq keńsesi quryldy

Qazaqstan • Búgin, 19:47

Baspanaly bolý múmkindikteri aıtyldy

Aımaqtar • Búgin, 18:15

Alakól jaǵalaýy abattandyrylyp jatyr 

Aımaqtar • Búgin, 17:44

ForteBank: Bir dollar – 388 teńge

Qazaqstan • Búgin, 15:35

Uqsas jańalyqtar