Biz Otan kúzetindemiz. Teńizde de, qurlyqta da qorǵanysymyz kúshti. Al áýe qorǵanysynda kúnge de tiktep qaraı alatyn qyrandaı qyraǵy bizdiń zenıttik zymyran dıvızıony tur.
Joǵarǵy Bas qolbasshysynyń, Qorǵanys mınıstrliginiń atqaryp kele jatqan qyrýar jumysy eń aldymen el áskeriniń qýatyn arttyrýǵa negizdelgen. Áskerı adam retinde ony bir kisideı sezinemin. Kók Týymyz kókte jelbirep turǵanda, onyń myzǵymastyǵyn kózdeıtin sarbazdar únemi sapta turady.
Meniń ata-anam áskerı adamdar edi. Ákem de, sheshem de Otan qorǵaý isiniń bilikti mamandary boldy. Sondyqtan bolar, bala kúnimnen beri ne baǵdarlamalaýshy, bolmasa áskerı adam bolatynyma senimdi edim. Otbasylyq ıgi dástúrdi meniń de jalǵastyrǵym keldi. Alaıda áskerı ónerdi ıgerý úshin qurlyq nemese shekara áskeri ýchılıshelerine barýdy kózdegem joq. Arnaıy mamandyǵym bolsa dedim. Osy maqsatpen elektronıka jáne baılanys áskerı ınjenerlik ınstıtýtyna tústim. Ushýdy aýdıo-tehnıkalyq qamtamasyz etý fakýltetine oqýǵa qabyldandym. Sebebi baldyrǵan kezimnen naqty ǵylymǵa beıimim bar edi.
Oqýymdy oıdaǵydaı aıaqtaǵan soń, bilimimdi jetildirý maqsatynda Belorýssııadaǵy áskerı ınstıtýtta tálim aldym. Segiz aıǵa sozylǵan oqý merzimi aıaqtalǵan soń, 2009 jyly Qazaqstanǵa qaıtyp oralyp, 44813 áskerı bólimine áskerı qyzmetke bekidim. Osynaý 11 jyl merzim aralyǵynda kishi leıtenant sheninen dıvızıon komandıri laýazymyna deıin joǵarylap, maıor shenine qol jetkizdim.
Áskerı dıvızıon komandıri bolý – úlken jaýapkershilikti júkteıdi. Dıvızıon ofıseri ınjener bolý tıis. Isten shyqqan tehnıkany qalpyna keltire bilýi qajet. Áskerı mindetimiz – jaýdyń áýe shabýylyna toıtarys berý. Qajet bolǵan jaǵdaıda dushpannyń aerodınamıkalyq nysanalarynyń, taktıkalyq, ballıstıkalyq raketalarynyń kózin joıýǵa qaýqarlymyz. Iаǵnı astanamyzdyń ashyq aspanyn udaıy kúzetip turmyz desem de bolady. Sondaı-aq jas sarbazdardyń jaýyngerlik tájirıbelerin de jetildiremiz. Sheberligimizdi oqý-jattyǵý alańdarynda, polıgondarda shyńdap, túrli áskerı oıyndarǵa, saıystarǵa qatysamyz. Máselen, 2016 jyly Reseı Federasııasynda ótken «Aspannyń kilti» saıysyna qatysyp, júldeli 3-oryndy ıelendik. Sondaı-aq kúni keshe Otan qorǵaýshy kúni qarsańynda Prezıdent Qasym-Jomart Toqaevtyń Jarlyǵymen eldiń ulttyq qaýipsizdigi men qorǵanys qabiletin qamtamasyz etýge qosqan úlesim eskerilip, «Jaýyngerlik erligi úshin» medalimen marapattaldym.
Ár áskerı qyzmetshiniń Otan aldyndaǵy basty paryzy – týǵan eline qaltqysyz qyzmet etý. El sarbazdary bul mindetti abyroımen arqalap keledi.
Aleksandr TOMILIN,
Qorǵanys mınıstrligi 44813 áskerı bólimi S-300 zenıttik zymyran dıvızıonynyń komandıri, maıor
