Basqosýda oblys ákiminiń orynbasary Nurjan Kalenderov baıandama jasap, sıfrlandyrýdy engizý boıynsha birqatar bastamalardyń oryndalmaǵanyn aıtty. Máselen, bilim berý salasynda 7 bastamanyń 5-eýi, densaýlyq saqtaý salasynda 12 bastamanyń 10-y ǵana júzege asyrylǵan. Sonymen qatar, áleýmettik qyzmetterdi usyný, qalalyq basqarýshylyq, kólik, jer qatynastary jáne turǵyn úı-kommýnaldyq sharýashylyq salalarynda da kemshilikterdiń bar ekeni anyqtalǵan.
«El Prezıdenti naqty mindetterdi aıqyndap berdi. Úkimet olardy oryndaýǵa baǵyttalǵan sharalardy belgiledi. Biraq strategııalyq maqsattarǵa jetý jolynda kidiris baıqalýda. Sıfrlandyrýdy júzege asyrýda bizdiń oblys respýblıka boıynsha artta qalǵandardyń qatarynan kórinip otyr. Biz bul týraly jyl basynan beri aıtyp kelemiz, biraq nátıje joq. Áli de sol qalpynda. Munyń bári jaýapty tulǵalar tarapynan tıisti baqylaý men talaptyń joqtyǵynyń saldary» dedi Berdibek Saparbaev.
Kezdesý barysynda ákim bilim berý salasynda jańa oqý jyly bastalǵanǵa deıin aqparattyq júıelerdi biriktirý boıynsha jumystardy aıaqtaýdy tapsyrdy. Sondaı-aq, ár mektepte polısııa bólimderi men jedel basqarý ortalyǵyna baılanystyrylǵan beınebaqylaý kameralary ornatylýy tıis.
Tıisti basshylarǵa áleýmet-eńbek salasynda elektrondyq qyzmet kórsetý úlesin 70 paıyzǵa deıin jetkizý, áleýmettik ID-kartany iske qosý mindetteri júkteldi. Taraz qalasy boıynsha basqarý salasynda áli de kóp sharýa atqarylý kerektigi aıtyldy. Qala basshylyǵyna áýeli memlekettik qyzmetterdi avtomattandyrýdy, «Ashyq ákimdik» front-ofısin qurý qajettigi eskertildi. Páter ıeleri men servıstik uıymdar arasyndaǵy ózara qarym-qatynasty jetildirip, kóshelerdi jaryqtandyrýdy basqarý júıesin de retteý kerek.
Sondaı-aq qoǵamdyq kólikterde elektrondy bılettendirýdi engizý mindeti de áli ózekti másele kúıinde qalýda eken. Jol qozǵalysy men baǵdarshamdardy basqarý júıesin jetildirý isi de mańyzdy bolyp otyr.
«Buǵan deıin ótken kezdesýde jaýapty tulǵalar alǵa qoıylǵan mindetterdiń aǵymdaǵy jartyjyldyqtyń aıaǵyna deıin oryndalatynyna sendirgen edi. Endi ol merzim qazan-qarasha aıyna aýysypty. Ol úshin sebep taýyp, koronavırýs, karantındi alǵa tartýda. Sıfrlandyrý boıynsha jumystardy bir aıdan soń qaıta qaraımyz. Suranys qatań bolady. Bizge jaı syltaý, bos sózder emes, naqty nátıje kerek», dedi Berdibek Saparbaev.
Jambyl oblysy
