Aımaqtar • 14 Mamyr, 2020

Egov.kz portalynda keńesterdi vıdeo arqyly alý múmkindigi jasaldy

16 retkórsetildi

Endi «Azamattarǵa arnalǵan úkimet» memlekettik korporasııasynyń operatorlary beıneqońyraý shalǵan qazaqstandyqtarǵa elektrondyq úkimet portalynda vıdeo arqyly keńes bere alady. Egov.kz portaly ekranyndaǵy áreketti bólisý servısin  «Ulttyq aqparattyq tehnologııalar» AQ mamandary jasap shyǵardy. Bul týraly atalǵan korporasııanyń Mańǵystaý oblysy boıynsha fılıaly baspasóz qyzmeti habarlady.

Vıdeo arqyly keńes berýshi mamannyń kómegin alý úshin paıdalanýshy basty bettiń oń jaq tómengi buryshyndaǵy «Vırtýaldy assıstent» túımesin basýy kerek. Ashylǵan terezede beınekamera belgisin tańdaý qajet. Júıe paıdalanýshydan beınekamera men mıkrofonnyń qosylýyna ruqsat suraıdy. Birneshe sekýnd ishinde HQO operatory klıentpen baılanysqa shyǵady. Ekrandaǵy áreketti kórsetý úshin qyzmet alýshy «Ekran demonstrasııasy» túımesin, sodan keıin «Bólisý» batyrmasyn basýy kerek.

Osylaısha, HQO operatory abonenttiń monıtoryn kóre alady jáne oǵan egov.kz portalynda kez kelgen qyzmetti, onyń ishinde ESQ-ny qashyqtan rásimdeýge kómektesip, mobıldi azamattar bazasyna tirkeı alady.

«Azamattarǵa arnalǵan úkimet» memlekettik korporasııasynyń basqarma tóraıymy Ásemgúl Baltashevanyń aıtýynsha, ekrandy «bólisý» servısi operator men klıenttiń arasyndaǵy baılanysty aıtarlyqtaı jeńildetti, óıtkeni qyzmetterdi usyný prosesinde 1414 telefony arqyly keńes berý tıimdi bolǵanymen, qashanda yńǵaıly bola bermeıdi. «Buryn bizdiń operatorlar klıentten qaı siltemeni, qaı bólim men qyzmetti ashqanyn únemi surap otyratyn. Endi biz ekranda bolyp jatqan barlyq áreketti kóre alamyz jáne klıentti qandaıda bir qyzmetti alý joldary boıynsha birden baǵyttaı alamyz. Bul servıs azamattarymyzdyń sıfrlyq saýatyn qashyqtan arttyrýǵa da múmkindik beredi», – dedi ol.

Esterińizge sala keteıik, koronavırýs ınfeksııasynyń taralý qaýipiniń saqtalýyna baılanysty, HQO arqyly tek «qaǵaz» júzinde kórsetiletin qyzmetterdi alýǵa bolady. Egov.kz portaly arqyly qoljetimdi qyzmetterdi úıden nemese ákimdikterde, bilim berý jáne medısına uıymdarynda t.s.s. jerlerde ornalasatyn ózine-ózi qyzmet kórsetý sektorlarynda alý kerek. Memlekettik qyzmetterdi elektrondy túrde alý boıynsha egov.kz portalyndaǵy vırtýaldy assıstent keńesshileri jáne 1414 biryńǵaı baılanys ortalyǵynyń mamandary kómektese alady.

Aıta keteıik, qazirgi ýaqytta Qazaqstanda memlekettik qyzmetterdiń 80% -dan astamy elektrondy formatta qoljetimdi.

 

 

Mańǵystaý oblysy

Sońǵy jańalyqtar

Jigittiń jaqsysy

Rýhanııat • Keshe

Uqsas jańalyqtar