32 jastaǵy Fetteldiń kelisimsharty osy maýsymda aıaqtalady. Ol bir jylda «Ferrarı» komandasynan 40 mıllıon eýro jalaqy alatyn. Buǵan deıin F1-Insider portaly «Ferrarı» Fettelge eki jylǵa kelisimshart usynǵanyn jazǵan edi. Kelisimshartta jalaqy somasy koronavırýs pandemııasyna baılanysty qazirgiden az kórsetilgen.
Fettel «Formýla-1» jarysynda 2007 jyldan beri baq synap keledi. Ol «Red Býll» komandasy sapynda álemniń tórt dúrkin chempıony atanǵan (2010–2013). Nemis avtoshabandozy «Ferrarıge» 2015 jyly aýysqan bolatyn.
Koronavırýs indetine baılanysty «Formýla-1» básekesiniń bıylǵy maýsymy áli bastalǵan joq. Búginge deıin Bahreın, Vetnam, Qytaı, Nıderland, Ázerbaıjan jáne Kanada gran-prıi keıinge qaldyryldy. Al Aýstralııa, Monako, Ispanııa jáne Fransııadaǵy jarystar ótpeıtin boldy.
