Aımaqtar • 15 Mamyr, 2020

Aqmolada muqtaj jandar baspanaly boldy

11 ret kórsetildi

Shalǵaıdaǵy Jarqaıyń aýdanynda 486 otbasy baspana alý kezeginde tur. Jyl sońyna deıin 60 otbasy kópten kútken páterlerine qol jetkizbek.

Nadejda  Lojkına ótken jyly qonys toıyn toılaǵan. Bul onyń alǵashqy jeke baspanasy. Qýanyshynda shek joq. Aıtýynsha uzaq jyl páterden páterge kóship, kóp qıyndyq kórgen. 2013 jyldan beri baspana kezeginde turǵan. Eki balanyń anasy bastaýysh synyptyń muǵalimi eken. Byltyr páter kiltin tabystaǵan kezdegi baqytty sáti jadynda óshpesteı bolyp jattalyp qalypty.    

–Maǵan jańa salynǵan úıden páter berildi. Kópten kútken baspanamyz. Páterimiz jap-jaryq. Qysta jyly. Jastarǵa arnalǵan osyndaı baǵdarlamanyń baıandylyǵyna qýanamyn,–deıdi aýdan ortalyǵy Derjavınsk qalasynyń turǵyny Nadejda Lojkına.

Bıýdjettik mekemelerdiń Nadejda syndy taǵy 25  qyzmetkeri baspanaly boldy.  Sondaı-aq, kópbalaly 13 otbasy men 12 jetim bala ótken jyly qonys toıyn toılady.   

–Aýdanda  memlekettik turǵyn úı qorynan baspana alýǵa 486 adam kezekte tur. Olardyń ishindegi 95-i jetim jáne ata-anasynyń qamqorlyǵynan aıyrylǵan balalar, 142-si halyqtyń áleýmettik osal toby, memlekettik jáne bıýdjettik uıymdardyń 248 qyzmetkeri,–deıdi aýdandyq turǵyn úı-kommýnaldyq bóliminiń bas mamany Ásııa Haırýllına.

Aýdanda qurylys qarqyny bıyl da báseńdemeıdi. Qarasha aıynda 60 páterli turǵyn úı tapsyrylady dep kútilýde. Qurylys «Nurly jer» baǵdarlamasy aıasynda júzege asyrylmaq.

 

 

Sońǵy jańalyqtar

Rýbl baǵamy quldyrady

Ekonomıka • Keshe

Uqsas jańalyqtar