Rýhanııat • 15 Mamyr, 2020

Qos maıdannyń jeńimpazy

68 retkórsetildi

Sozaq óńiriniń halqy Ekinshi dúnıejúzilik soǵys kezinde maıdanda da, tylda da nebir erliktiń úlgisin kórsete bildi. Solardyń arasynan soǵys ardageri, kezinde eline eńbegin sińirgen Mahmut Beristemovtiń esimin Jeńistiń 75 jyldyǵy qarsańynda erekshe atap ótkim keledi.

Soǵys ardageri Mahmut Beristemov 1922 jyly 2 mamyrda Sozaq aýdany Syzǵan aýylynda dúnıe esigin ashyp, týǵan aýylynda 1999 jyly 29 qazanda ómirden ozdy.

Mahań 1941 jyly armııa qataryna alynǵan. 1941-1942 jyldary Jambyl qalasynda (qazirgi Taraz) 105-shi ulttyq atty ásker dıvızııasynda jattyǵýdan ótedi. Keıinnen artıllerııa salasyna aýystyrylady. 1942 jyly 482-shi tankke qarsy shabýyldaıtyn zeńbirek polkynda nemis fashısterine qarsy keskilesken urystarǵa qatysady. Stalıngrad maıdanynda jeńil jaraqattanyp, 1943 jyly maýsym aıynda qaıtadan soǵysqa kiredi. Ýkraına, Polsha jerin fashısterden azat etedi.

M.Beristemov Jeńisti Germanııanyń Drezden qalasynda qarsy alady. 1945 jyly tamyz aıynda Shyǵysta japon áskerine qarsy shaıqastarǵa qatysady.

Soǵystaǵy erlikteri úshin «Qyzyl Juldyz», I jáne II dárejeli «Dańq», I jáne II dárejeli «Otan soǵysy» ordenderimen, «Erligi úshin» jáne basqa da 14 eskertkish medalmen marapattalyp, 1946 jyly jeńispen elge oralady.

Beıbit ómirde alǵash eńbek jolyn jańadan uıymdastyrylǵan Jýantóbe, Tasty, Shý sovhozdarynda aýyldyq keńes tóraǵasynyń hatshysy, tóraǵasy qyzmetterin atqardy.

Soǵystan zardap shekken aýyl sharýashylyǵyn qalpyna keltirý isine belsene aralasyp, iskerlik qabiletin kórsetti. 1957 jyly Qaplanbek zootehnıkýmynda oqyp, kishi agronom mamandyǵyn aldy.

Eńbegi baǵalanyp, kóptegen marapattarǵa ıe boldy. Zeınet demalysyna «Respýblıkalyq dárejedegi derbes pensıoner» dárejesimen shyqty.

Mahań Sozaqtaǵy Sańǵyl bı kesenesin salýda únemi qurylys basynda bolyp, jumys istep jatqan jigitterge aqyl-keńesin berip, aıryqsha uıymdastyrý qabiletin kórsete bildi. Kesene bitkennen keıin jazýshy Á.Kekilbaev kelip rızashylyǵyn bildirip, Sańǵyl bı týraly kóptegen derekter aıtty.

Mahań adam jatyrqamaıtyn. Kúndiz-túni úıinen qonaq úzilmeıtin. Jeńgemiz Ádısha Múshekenova ashyq jarqyn minezdi jan edi. Sondyqtan da qaı mezgilde bolsyn dastarhany jaıýly, shaıy qaınaýly bolatyn. Ilgeride jazýshy S.Muqanov, jazýshy Á.Kekilbaev Mahańnyń úıinde qurmetti qonaq bolyp dastarhanynan dám tatqan.

Mahańnyń eńbektegi erligi jóninde jýrnalıst О́tesh Qyrǵyzbaevtyń, jýrnalıst Esirkep О́mirbekovtiń kitaptarynda jazylyp, gazetterde maqalalar shyqqan.

 

Myrzahmet JYLYSBAEV,

soǵys ardageri, qart ustaz

Sońǵy jańalyqtar

Áke rýhynan qýat alǵan qaısar jan

Rýhanııat • Búgin, 11:54

Abylaıhannyń aq joly

Aımaqtar • Búgin, 10:05

Uqsas jańalyqtar