18 mamyrdan bastap Nur-Sultannyń barlyq mektepke deıingi uıymdary menshik túrine qaramastan birinshi kezekte jumys isteıtin, balamen úıde otyrýǵa múmkindigi joq ata-analar úshin kezekshi toptardyń rejıminde jumysyn bastaıdy, dedi búgin qalalyq ákimdikte ótken brıfıngte bilim basqarmasynyń basshysy Sholpan Qadyrova.
«Árbir mektepke deıingi uıymda bala sany 15-ten aspaıtyn kezekshi toptardy ashý josparlanyp otyr. Eger bala balabaqshaǵa kelmese, orny saqtalady. Búgingi kúni mektepke deıingi uıymdardaǵy qajettilikti anyqtaý úshin ata-analardyń arasynda monıtorıng júrýde. Ol úshin ata-analar tárbıeshige balanyń baqshaǵa baratyny týraly bir kún buryn habarlaýy tıis», - dedi Sh.Qadyrova.
Buǵan qosa, balabaqshadaǵy kezekshi toptardyń jumysynyń algorıtmi ázirlendi.
«Barlyq nysandar sanıtarlyq talaptarǵa sáıkes daıyndaldy: zalalsyzdandyrý, tazartý, mektepke deıingi uıymnyń aýmaǵy men ǵımaratyn dezınfeksııalaý, antıseptıkter men qajetti jeke qorǵanysh quraldary – maska men qolǵap satylyp alyndy», - dedi ol.
Balalar ýchaskelik pedıatordan balanyń densaýlyǵy týraly anyqtama ákelgen kezde ǵana qabyldanady. Balany baqshaǵa qabyldaý kezinde tárbıeshi medısına qyzmetkeri men ata-anasynyń kózinshe termometrııa arqyly mindetti tańǵy tekserý júrgizedi.
«Ata-analardy túsinistik tanytyp, balabaqshada tárbıelenýshiler úshin qaýipsiz jaǵdaı jasaýǵa kómektesýlerin suraımyz. Al 1 maýsymnan bastap mektepke deıingi uıymdardyń jumysy shtattyq rejımde jumysyn qaıtadan bastaıdy dep josparlanyp otyr», - dedi Nur-Sultan qalasy Bilim basqarmasynyń basshysy.
18 mamyrdan bastap arnaıy uıymdar, psıhologııalyq-medısınalyq jáne pedagogıkalyq konsýltasııalar (PMPK), psıhologııalyq-pedagogıkalyq túzetý bólmeleri (QPPK), ońaltý ortalyqtary (QK) sanıtarlyq qaýipsizdik sharalaryna saqtaı otyryp jumysyn jalǵastyrady. Erekshe qajettiligi bar balanyń árqaısymen jeke jumys isteledi jáne jańa oqý jylyna baratyn balalarǵa arnalǵan oqý baǵdarlamasy anyqtalady.
Qandaı da bir suraqtar bolsa, ata-analar 55 68 83, 55 68 73, 1445 nómiri arqyly Bilim basqarmasynyń koll-ortalyǵyna habarlasa alady. Sh.Qadyrova TJ kezinde memlekettik komıssııanyń sheshimimen mektepke deıingi uıymdar menshik túri men balalardyń barmaǵanyna qaramastan memlekettik tapsyryspen úzdiksiz qamtamasyz etilip otyrǵanyn aıtty. 2020 jyldyń 1 shildesinen bastap jergilikti bıýdjetten jekemenshik baqshalarǵa 2 856 orynǵa memlekettik bilim berý tapsyrysyn ornalastyrý kózdelýde.
Qazir elordada 377 mektepke deıingi uıym bar, onyń 94-i memlekettik, al 237-i jekemenshik. Bul uıymdarǵa barlyǵy 55 708 bala barady.
