Qazaqstan • 16 Mamyr, 2020

Aýyl sharýashylyǵy mınıstri is-saparmen ShQO-da boldy

49 retkórsetildi

Shyǵys Qazaqstan oblysyna jumys saparymen barǵan Saparhan Omarov kóktemgi dala jumystarynyń jaıymen tanysyp, iri tuqym ósirý sharýashylyǵynda boldy. Bul týraly Aýyl sharýashylyǵy mınıstrliginiń baspasóz qyzmeti habarlady.

Aýyl sharýashylyǵy mınıstrine óńirdegi ákimdik ókilderi egin naýqanynyń jaı-kúıin tolyqtaı tanystyrdy. Búgingi tańda jer jyrtý, ylǵaldy jabý jáne kúzdik daqyldar men kópjyldyq shópterdi egý jumystary tolyǵymen aıaqtaldy.

Jalpy, bıyl Shyǵys Qazaqstan oblysynda 1,3 mıllıon gektar alqapqa egin egiledi, bul ótken jylmen salystyrǵanda 6,8 myń gektarǵa kóp. Kóbine oblysta dándi jáne burshaqty, sonymen birge maıly daqyldar egiledi. 445 myń gektardan astam jerge negizinen maıly daqyldar salynady.

Sondaı-aq, 19 myń ga jerge kartop, 16 myńǵa kókónis pen baqsha salynady. Bul Shyǵys Qazaqstan oblysyndaǵy jalpy egis alqabynyń 2,5% quraıdy.

Oblysta kóktemgi dala jumystaryn 2,5 myńnan astam sharýa qojalyqtary júrgizedi. Oǵan 16,6 myń traktor, 5 myńnan astam júk kóligi, 93 egin egý kesheni, 11 myńnan astam sepkish, soqalar men qopsytqyshtar tartyldy.

Egis alqaby úshin Pavlodar MHZ-nan 30 myń tonna dızel otyny berildi. Tuqym, mıneraldy tyńaıtqyshtar, gerbısıdter men pestısıdter satyp alýǵa sýbsıdııa túrinde oblystyq bıýdjetten 5,4 mlrd. teńgeden astam qarajat bólindi.

Kóktemgi dala jumystarymen tanysqannan keıin Aýyl sharýashylyǵy mınıstri Glýbokoe aýdany, Solnechnoe aýylyndaǵy «Maıly daqyldardyń tájirıbelik sharýashylyǵy» JShS ujymymen kezdesti. Bul 55 jyldyq tarıhy bar kompanııa. Negizgi baǵyty kúnbaǵys jáne dándi daqyldardyń joǵary reprodýksııasynyń tuqymdaryn óndiredi, sonymen qatar, aýylsharýashylyq ónimderiniń taýarlyq óndirisi jáne sút fermalary bar. Kompanııada 350 adam jumys isteıdi.

Kompanııa dırektory M. Atahanov mınıstrge qoldanystaǵy óndiristik baza jaıly baıandady. Onyń aıtýynsha, fermada 10 myń gektar alqap bar, onda kúzdik jáne jazdyq bıdaı, arpa, burshaq, soıa, kúnbaǵys jáne kópjyldyq ósimdikterdiń tuqymdary ósiriledi. Maıly daqyldarǵa ásirese kúnbaǵysqa erekshe basymdyq beriledi. 1965 jyldan bastap kompanııa 20-dan astam joǵary sapaly maı túrlerin shyǵardy.

Saparhan Omarov tájirıbeli sharýashylyqta ǵylymdy damytýǵa 100 mıllıonnan astam qarajat tartý boıynsha jumystar uıymdastyrylǵanyn atap ótti. Investorlar qarajatyna jańadan seleksııalyq tuqym sharýashylyǵy jáne zerthanalyq qurylǵylar alynǵan.

Sońǵy jańalyqtar

Jigittiń jaqsysy

Rýhanııat • Keshe

Uqsas jańalyqtar