Qoǵam • 18 Mamyr, 2020

Tar profıldi eski aýrýhanalardy aýystyrýymyz kerek - Eljan Birtanov

36 retkórsetildi

Densaýlyq saqtaý mınıstri Eljan Birtanov Facebook paraqshasynda elimizge sheteldik seriktesterdi tarta otyryp, jańa aýrýhanalar salý qajet ekenin jazdy.

«Biz aýrýdyń aldyn alý men erte anyqtaýǵa bet aldyq. Ol úshin emhanalyq kómekti damytamyz. Búkil álem aldymen Almaty, al odan keıin Astana deklarasııalaryn qoldady. Biraq stasıonarlyq kómek te damýy tıis. Sebebi soqyrishek nemese bosaný eshqaıda joǵalyp ketpeıdi. Kardıohırýrgter men neırohırýrgter ınfarkt pen ınsýlt kezinde, al travmatolog jaraqattaný kezinde qutqarýy tıis. Týa bitken jáne júre bitken kemistigi bar balalarǵa operasııa, al eresekterge býyndar ne bolmasa ózge de aǵzalar men tin transplantasııasy qajet. Munyń barlyǵyn jáne basqa da kóp dúnıeni stasıonarlyq jaǵdaıda ǵana jasaýǵa bolady. Alaıda aýrýhanalarymyzdyń 80 paıyzdan astamy keńes zamanynda salynǵan. Sondaı-aq 20 paıyzdan astamy emdeý ǵımaratyna beıimdelgen, ıaǵnı, burynǵy jataqhana, balabaqshada ornalasqan. Aýrýhanalardyń jalpy tozýy 60 paıyzdan asyp ketken», - dep jazdy Eljan Birtanov Facebook paraqshasynda.

Onyń aıtýynsha, mundaı jaǵdaıda aldyńǵy qatarly tehnologııalardy damytý múmkin emes. Olar pasıentter men personaldar úshin jaısyz jáne medısına qyzmetkerleriniń kásibı turǵyda ósýin tejeıdi.

«Búkil progressıvti álem jańa klınıkalar salýda. Azamattarymyz Ońtústik Koreıanyń, Germanııanyń nemese Túrkııanyń zamanaýı aýrhanalarynda emdelgisi keledi. Sondyqtan biz sheteldik seriktesterdi tarta otyryp, jańa aýrýhanalar salýymyz, aldyńǵy qatarly medısınalyq tehnologııalardy engizýimiz jáne mamandarymyzdy oqytýymyz qajet. Jekelegen ári tar profıldi eski aýrýhanalardy aýystyrýymyz kerek. Tek sol jaǵdaıda ǵana zamanaýı tehnologııaǵa qol jetkize otyryp, medısına qyzmetkerlerimizdiń kásibıligi jańa deńgeıge kóteriledi. Sol kezde ambýlatorııalyq jáne stasıonarlyq kómektiń sabaqtastyǵy bolady. Al qazaqstandyqtarǵa ońtaıly ári sapaly otandyq medısına qyzmeti beriledi», - delingen mınıstr jazbasynda.  

 

Sońǵy jańalyqtar

ForteBank: Bir dollar – 388 teńge

Qazaqstan • Búgin, 15:35

Áke rýhynan qýat alǵan qaısar jan

Rýhanııat • Búgin, 11:54

Uqsas jańalyqtar