Dáýletjan Hasanov birinshi toqsannyń nátıjesi boıynsha kompanııanyń tabysy ótken jyldyń osyndaı kezeńimen salystyrǵanda 3 esege qysqaryp, al keıbir enshiles kásiporyndardyń shyǵynǵa tap bolǵanyn habarlady. Osyǵan baılanysty qarjylyq jaǵdaıdy turaqtandyrý jáne naryqtyq jaǵdaıdyń teris áserin tómendetý úshin «QazMunaıGazda» daǵdarysqa qarsy strategııa jasaqtalýda. Bul strategııa kompanııaǵa shyǵyndardy azaıtýǵa jáne daǵdarystan keıingi kezeńde tıimdi áreket etýine múmkindik beredi.
Atap aıtqanda, kompanııa bıznes-úderisterdi ońtaılandyrýdy júrgizýde jáne daǵdarys kezinde ózektiligin joǵaltatyn kóptegen jobalar men is-sharalardy iske asyrý jónindegi josparlaryn qaıta qarastyrýda. Dáýletjan Hasanovtyń aıtýy boıynsha, shyǵyndardy ońtaılandyrý birinshi kezekte basshylyqtyń jalaqysynan bastaldy. Kompanııada 12 mamyrda laýazymdyq jalaqylardyń jańa júıesi bekitildi. Ol basqarma tóraǵasy men orynbasarlardyń jalaqysyn 30%-ǵa qysqartýdy kózdeıdi. Sonymen qatar basqarýshylyq laýazymdardy qysqartý jáne qyzmetkerlerdi tómengi laýazymdarǵa taǵaıyndaýmen baılanysty orta býyn basshylarynyń jalaqysy 20%-ǵa deıin tómendeıdi. Qatardaǵy qyzmetkerlerdiń jalaqysy burynǵy deńgeıde saqtalady. Nátıjesinde, 2020 jyly syıaqy men bonýstardan bas tartýdy eskergende, QMG ortalyq apparatynyń basqarýshy qyzmetkerleriniń kirisi 50%-dan astamǵa azaıady.
Buǵan deıin habarlanǵandaı, daǵdarysqa qarsy strategııany iske asyrý aıasynda QMG ortalyq apparatyndaǵy qyzmetkerler sanyn 34%-ǵa, 729-dan 480 adamǵa deıin ońtaılandyrady. Dáýletjan Hasanovtyń aıtýy boıynsha, bosatylatyn qyzmetkerlerdiń 90%-y «QazMunaıGaz» júıesinen ketedi. Eńbek naryǵyndaǵy jaǵdaıdy eskere otyryp, «Samuryq-Qazyna» qorynyń tapsyrmasy boıynsha qyzmetkerlerdi áleýmettik jaýapty bosatý baǵdarlamasy ázirlendi. Ol kompensasııalyq tólem jıyntyǵyn jáne aýtpleısment baǵdarlamasyn qamtıdy.
Kompensasııalyq tólem jıyntyǵy:
– 3 aılyq jalaqy mólsherindegi birjolǵy tólemdi;
– tabysynan aıyrylǵan ótemaqy retinde 6 aı boıy qarjylyq qoldaýdy;
– 2021 jylǵy aqpan aıyna deıin kompanııa esebinen medısınalyq saqtandyrý qyzmetterin paıdalaný quqyǵyn qamtıdy.
О́z kezeginde «QazMunaıGaz» aýtpleısment baǵdarlamasy osy saladaǵy konsýltanttardyń qatysýymen birqatar sharany qarastyrady. Konsýltanttar qyzmetkerlerge ózderiniń myqty tustaryn, eńbek naryǵyndaǵy qazirgi suranysty taldaýǵa jáne jeke damý josparlaryn jasaýǵa kómektesedi. Olar qyzmetkerlerge suhbat kezinde ózin qalaı ustaý kerektigin, túıindemeni durys toltyrýdy jáne t.b. úıretedi. Sondaı-aq qyzmetkerlerdiń barlyǵy toptyq oqýdan ótedi. Osynyń barlyǵy olardyń bolashaqta jumysqa ornalasý múmkindigin arttyrady.
«Bul álemge taralǵan tájirıbe bolǵanymen, «QazMunaıGaz» - óziniń burynǵy qyzmetkerlerin qoldaý úshin osyndaı baǵdarlamany engizgen alǵashqy qazaqstandyq kompanııa deýge bolady. Qyzmetkerlerdi ońtaılandyrý árqashan aýyr jáne jaǵymsyz prosess ekenin jaqsy túsinemiz. Mundaı jaǵdaıda keıbir adamdar ármen qaraı ne isteý kerektigin, qaıda baratynyn bilmeı, sasqalaqtap qalýy múmkin. Bizdiń mindetimiz - olarǵa kómektesý», – dedi Dáýletjan Hasanov.
