Aımaqtar • 19 Mamyr, 2020

Jeti aǵaıyndynyń jemisti jumysy

87 retkórsetildi

Aq adal eńbegimen jerdiń babyn taýyp, bererin molaıtyp kele jatqan tutas bir áýletterdi kórgende sabaqtastyqtyń sátimen oralǵanyna ishteı tánti bolasyń. Sandyqtaý aýdanyndaǵy Abýevter áýleti de baqytyn eńbekten tapqan, yntymaǵynyń arqasynda yrysyn molaıtqan jandar.

Tabıǵaty tańdaı qaqtyratyn ásem aýdannyń topyraǵy aı­ryqsha qunarly. Ásirelep aıt­qanda, «jetek shanshysań, arba ósip shyǵady» deıtin-aq jer. Adam­dary da jomart jerdiń ıgiligin mańdaı terimen molaı­typ júrgen eńbek erleri. Bir aıta keterligi, tutas áýletimen egin egip, aqyq dán ósirgender kóp-aq. Máselen, tyndyrymdy jumys, nátıjeli eńbektiń arqa­synda ataqtary aspandap turǵan Orazalın, Zakýsılov, Dohaev jáne Abýevter áýletterin iltı­patpen aıta ketýge ábden bolady.

Abýevter otbasy tórt urpaq­tan beri eginshilikpen aınalysyp keledi. Otbasyndaǵy jeti aǵaıyn­dynyń bári kindik qany tamǵan kórkem óńirden qarǵa adym uzamaı, eginshiliktiń jalynan ustaǵan. О́zderiniń aıtýyna qaraǵanda, ár kún saıyn alqap basynan tabylmasa, ishkenderi as bolmaıdy.

Yntymaǵy jarasqan aǵa­ıyn­dylar dál qazir alty zama­naýı egis keshenimen qara buı­ra topyraǵy jylqynyń qartasyndaı týyryla tóńkerilip jatqan alqapqa dán sińirýde. Kóktemniń bir kúni jylǵa azyq ekendigin bala jasynan boıyna sińirgen dıqandar bir táýlikte 800 gektardan astam jerdi qamtyp úlgeredi. Osy qarqynnan tanbasa, aınaldyrǵan 10-12 kún­niń ishinde dıqannan joǵary jaýapkershilikti talap etetin kóktemgi egisti aıaqtap shyqpaq. Dál qazir egistik jeri babynda, tehnıka da aqaýsyz júrip tur.

– Ata-babamyzdyń osy bir qa­sıetti jerge qonystanǵany biz úshin baqyt bolyp oraldy, – deıdi «Spasskoe Agro» seriktestiginiń dırektory Magomed Abýev,–eginshilik bizdiń mańdaıymyzǵa jazylǵan dúnıe, ata dástúr desek te bolar. Kózimizdi ashqannan ákemizdiń shalǵaıyna jarmasyp, egistik alqaptan shyqqan emespiz. Jerge ne qajet ekendigin, bizden ne tileıtindigin júregimizben túsinemiz. Bererin bergen soń jer de jomart. Áıtpese, tarylyp qalýy op-ońaı. Bul arada eń bastysy eńbek. Biz eńbek qadirin otbasynda úırengen, adal eńbekti ata dástúrine aınaldyrǵan adamdarmyz.

Seriktestik bıyl 11 myń gektar egistik alqabyna dán sebýdi josparlaǵan eken. Negizgi bóligi bıdaıdyń qatty jáne jumsaq sorttary. Eki jarym gektarǵa arpa egilmek. Maıly daqyldardyń da kólemi ótken jylmen salystyrǵanda birshama keńeıtilmekshi.

Búgingi tańda seriktestikte 70 adam eńbek etedi. Olardyń barlyǵy jergilikti jerde táp-táýir eńbek­aqylaryn ýaqtyly alyp otyr. Abýevter áýleti jetpis adam­ǵa jumys berip, sol arqyly jetpis otbasyn asyrap otyr desek te artyq emes.

Seriktestiktiń mashına-traktor parki tolyq jańartylǵan. Sondyqtan jaýapty naýqan kezinde kidiris joq. Onyń ústine jaqsy eńbekaqy alyp otyrǵan soń dıqan mehanızatorlar da ózderine tapsyrylǵan jumysty urshyqtaı úıiredi.

– Otyz jylǵa jýyq tehnıka tizginin ustap kelemin. Bu­ryn kónergen tehnıkamen ju­­mys istesek, endi mine, qýaty mol jańa keshenge de qolymyz jetti, – deıdi maıtalman mehanı­zator Vıtalıı Lıtvınov, – on­shalyqty qıyndyǵy joq eken. Eki jyldyń ishinde meńgerip aldym. Alymdylyǵy kúshti, bir táýlikte 120 gektar alqapqa dándi erkin sińiremin.

Sóz sońynda jomart jer­diń ıgiligin kórip otyrǵan áý­let­­­tiń alaǵan qoly beregen de eken. Bıznestiń áleýmettik ja­ýapkershiligi aıasynda mektep jasyna deıingi balalarǵa arnalǵan shaǵyn ortalyqty jumyrtqadaı jutyndyryp, jóndep beripti. Onyń ústine alty mıllıon teńgege qajetti jabdyqtar satyp ápergen. Mektep oqýshylarynyń ystyq tamaǵy da seriktestiktiń moınynda. О́tken jyly zamannyń talabyna saı qoǵamdyq monsha salsa, bıyl naýbaıhana, dámhana tárizdi áleýmettik nysandardy paıdalanýǵa bermek.

Kógerip kóktem shyqqaly alqap basynda júrgen aǵaıyn­dy dıqandar el jaıyn da es­ten shyǵarmaıdy. Jer aıaǵy degdisimen eldi mekendi abattandyryp, kógaldandyrý jumysyn qolǵa alǵan. Qazir qaı tarapqa qarasań da, uqypty qoldyń taby anyq baıqalady. Osynyń barlyǵy yjdaǵatty tirshilik, uıymshyldyqtyń arqasynda múmkin bolyp otyr. Adal eńbekti ata dástúri sanaý, sol dástúrge adal bolý qandaı ǵanıbet dese­ńizshi. Igiligin ózderi ǵana emes, jalpaq jurt ta kórip otyr.

 

Aqmola oblysy,

Sandyqtaý aýdany

Sońǵy jańalyqtar

Abaı murasy Bishkekte talqylandy

Rýhanııat • Búgin, 20:36

«Adal bilim» jobalyq keńsesi quryldy

Qazaqstan • Búgin, 19:47

Baspanaly bolý múmkindikteri aıtyldy

Aımaqtar • Búgin, 18:15

Alakól jaǵalaýy abattandyrylyp jatyr 

Aımaqtar • Búgin, 17:44

ForteBank: Bir dollar – 388 teńge

Qazaqstan • Búgin, 15:35

Uqsas jańalyqtar