Birden aıta keteıik, qazirgi kezde Qazaqstan qyzdar quramasynyń jaǵdaıy óte múshkil. Oǵan dálel – álemdik reıtıngte «TOP-10» balýandar qataryna bir ǵana burymdymyzdyń enýi. Ol – Otgonseseg Galbadrah. Biraq ol da Qazaqstannyń týmasy emes. 28 jastaǵy Otgonseseg Mońǵolııanyń túlegi ekenin jankúıerler jaqsy biledi. Sol elde júrip, dzıýdonyń qyr-syryna qanyqty. Ulanbatyrda jattyǵyp, biraz bıik belesterdi baǵyndyrdy.
2015 jyly Qazaqstanǵa qonys aýdarǵan Galbadrah óziniń myqtylyǵyn birden moıyndatty. Asa jeńil salmaqta beldesken ol elishilik jarystarda ǵana emes, qurlyqtyq jáne álemdik arenalarda daralandy. Atap aıtar bolsaq, Rıo Olımpıadasy, Azııa oıyndary, Dúnıejúzilik ýnıversıada jáne álem chempıonatynyń eki dúrkin qola júldegeri atandy. Azııa chempıony jáne sol jarystyń fınalısi degen ataqtary taǵy bar. Bir sózben aısaq, asa iri halyqaralyq dodalardyń qyz-kelinshekter saıysynda júlde alyp júrgen jalǵyz sportshymyz sol ǵana. Búgingi tańda 3353 upaı jıǵan Otgonseseg álemdik reıtıngte 9-oryndy ıelenýde.
Al qalǵan burymdylarymyzdyń qazirgi qarqynyna kóńilimiz esh tolmaıdy. Eń ókinishtisi, «TOP-50» tatamı sheberleriniń qataryna sanaýly ǵana otandasymyzdyń ózi ázer enip otyr. Osy jaǵdaı bizdi qynjyltady. Máselen, Otgonseseg Galbadrahtan keıingi táýir kórsetkishter myna dzıýdoshylarǵa tıesili: Sevara Nyshanbaev (57 kılo) – 36-oryn, Zarına Raıfova (78 kılo) – 44-oryn, Anna Kazıýlına (52 kılo) – 45-oryn, Aqmaral Naýatbek (48 kılo) – 50-oryn, Iolanta Berdibekova – (63 kılo) – 54-oryn, Nazgúl Maratova (+78 kılo) – 57-oryn jáne Móldir Narynova (70 kılo) – 65-oryn. Mine, bary osy! Tipten olardyń jıǵan upaılaryn jarııa etýdiń ózi yńǵaısyz. Eger aldaǵy jarystarda da jerlesterimiz nátıjelerin jaqsarta almasa, onda Qazaqstannyń tek bir ǵana balýany Olımpııa oıyndarynda baq synaıtyny anyq.
Myqtylar jaıynda áńgimeleıtin bolsaq, qazirgi kezde Japonııa quramasynyń qarqyny óte kúshti. Kúnshyǵys eliniń 14 ókili «TOP-10» dzıýdoshynyń sanatyna qosylyp otyr. Solardyń ekeýi – Ýta Abe (52 kılo) men Sorı Hamada (78 kılo) úzdikter tiziminde aldaryna jan salar emes.
Fransııa balýandarynyń da tegeýrini taý qoparatyndaı. О́z salmaq dárejeleri boıynsha Klarıss Agbenený (63 kılo) men Marı-Iv Gaıe (70 kılo) álemdik reıtıngte kósh bastap tur. 27 jastaǵy Klarıss Rıo Olımpıadasynyń kúmis júldegeri, álem chempıonatynda tórt márte dara shyǵyp, úsh ret kúmispen kúpteldi. 23 jastaǵy Marı-Iv dúnıejúzilik dodada bir altyn, eki kúmis jáne bir qolany qorjynǵa saldy. Jalpy, Fransııanyń segiz dzıýdoshysy úzdik ondyqtyń qatarynda.
О́zge salmaq dárejeleri boıynsha ýkraınalyq Darıa Bılodıd (48 kılo), kanadalyq Krısta Degýchı (57 kılo) jáne kýbalyq Idalıs Ortıs (+78 kılo) álemdik reıtıngtiń jeke-dara kósh basynda keledi. Árıne olardyń bul tabysyna esh tańdanýǵa bolmaıdy. О́ıtkeni esimderi atalǵandardyń barlyǵy da biraz jyldan beri asqan sheberlik tanytyp, baıraqty básekelerdiń bıiginen kórinýde.
Álemdik reıtıngte «TOP-10» dzıýdoshynyń qataryna Japonııanyń – 14, al Fransııanyń 8 ókili engeni jaıynda joǵaryda aıttyq. Odan bólek, osy tizimde Brazılııanyń – 6, Germanııanyń – 5, Kosovo, Kanada, Kýba, Ispanııa, Nıderlandtyń – 3, Reseı, Slovenııa, Ulybrıtanııanyń – 2, Ýkraına, Mońǵolııa, Portýgalııa, Qazaqstan, Italııa, Izraıl, Belgııa, Soltústik Koreıa, Taıpeı, Aýstrııa, Shveısarııa, Ázerbaıjan, Túrkııa, Chernogorııa, Belarýs jáne Týnıstiń 1 balýany bar.
Álemdik reıtıngtiń úzdikteri
48 kılo: 1. Darıa Bılodıd (Ýkraına), 2. Dıstrııa Krasnıkı (Kosovo), 3. Fýna Tonakı (Japonııa).
52 kılo: 1. Ýta Abe (Japonııa), 2. Amandı Býshar (Fransııa), 3. Aı Shıshıme (Japonııa).
57 kılo: 1. Krısta Degýchı (Kanada), 2. Djessıka Klımkaıt (Kanada), 3. Sýkasa Ioshıda (Japonııa).
63 kılo: 1. Klarıss Agbenený (Fransııa), 2. Tına Trestnıak (Slovenııa), 3. Mıký Tashıro (Japonııa).
70 kılo: 1. Marı-Iv Gaıe (Fransııa), 2. Chızýrý Araı (Japonııa), 3. Sanne van Deıke (Nıderland).
78 kılo: 1. Sorı Hamada (Japonııa), 2. Madelına Malonga (Fransııa), 3. Fannı-Estel Posvıt (Fransııa).
+78 kılo: 1. Idalıs Ortıs (Kýba), 2. Akıra Sone (Japonııa), 3. Sara Asahına (Japonııa).
