Qasym-Jomart Toqaev daǵdarystan keıin ekonomıkany qaıta qalpyna keltirý kezinde AHQO-nyń aldyna qoıylǵan mindetterdi tıimdi iske asyrýdyń mańyzdylyǵyna toqtaldy.
Osy oraıda Qazaqstan Prezıdenti ınvestısııa tartý jáne memlekettik aktıvti jekeshelendirý barysynda, qor naryǵyn damytýda AHQO áleýetin belsendi paıdalanýdy tapsyrdy. Al sharýashylyq daýlardy sheshýde AHQO soty men tórelik ortalyǵyna bıznestiń qoljetimdiligin qamtamasyz etý tıis.
Sonymen qatar Prezıdent AHQO ınvestısııalyq salyq rezıdenttigi baǵdarlamasyn ilgeriletý úshin Syrtqy ister mınıstrligi men memleketimizdiń sheteldik ókildikterimen birlesken jumystardy jandandyrýdyń qajettiligin atap ótti.
Kezdesý barysynda Qaırat Kelimbetov Ortalyqtyń ekojúıesi tolyq qalyptasqanyn, karantın sharalary kezinde onyń turaqty jumys istegenin baıandady.
Sondaı-aq Qaırat Kelimbetov Qasym-Jomart Toqaevqa Qazaqstanda alǵash ret AHQO alańynda buryn-sońdy bolmaǵan qarjy quraldary engizilgeni, atap aıtqanda, ıýanmen kórsetilgen oblıgasııalar shyǵarylyp, oblıgasııanyń ıslamdyq balamasy – sýkýktyń kross-lıstıngi ótkizilgeni týraly aıtty.
Kezdesý sońynda Memleket basshysy «Astana» halyqaralyq qarjy ortalyǵyn odan ári damytý boıynsha birqatar naqty tapsyrma berdi.
