Qazaqstan quramasynyń sportshylary Táýelsiz memleket retinde tuńǵysh ret AQSh-tyń Atlanta qalasynda jalaýy jelbiregen dúbirli dodada baq synady. Tórtjyldyqtyń basty básekesine jerlesterimiz alǵash ret qatysyp tursa da, alpaýyt eldermen ıyq tiresip, júlde úshin talasta aıanyp qalmady. Atap aıtar bolsa, sol jylǵy Olımpıadada otandyq sportshylar 11 medal jeńip aldy, onyń úsheýi altyn. Sonymen qatar taǵy da tórt kúmis pen tórt qola júldeni qorjynǵa saldy.
Qazirgi bessaıystan synǵa túsken Aleksandr Parygın de kútpegen jerden Olımp tuǵyryna kóterilgenin jasy úlken jankúıerler jaqsy biledi. Bizdiń sportshyǵa Olımpıada chempıony atty máńgilik ataqty alý ońaı bolǵan joq. О́ıtkeni 1996 jylǵy oıynda qazirgi bessaıys erejesi ózgerip, bes týrnırdiń barlyǵy da bir kúnde ótkizildi. Bul sportshylarǵa aıtarlyqtaı qıyndyq týdyrdy. Qazirgi bessaıystaǵy sheshýshi jarys júgirýge arnalǵan.
Parygın 1992 jylǵy Olımpıadanyń júldegeri, reseılik Edýard Zenovkanyń izin ala ekinshi nómirmen jarys jolyna shyqty. Reseılik sportshy negizgi toptan qara úzip, kósh basyna shyǵyp úlgerdi. Biraq Parygın odan kóz jazbaı, ıin tiresip kele jatty. Sol sátte stadıonǵa jınalǵan sportshylar men jankúıerlerdiń kókeıinde bir ǵana suraq, ıaǵnı «Márege kim birinshi jetedi eken?» degen saýal turǵan edi. Al sońǵy sekýndtarda Aleksandr búkil denesin alǵa tastap, máre syzyǵyn birinshi bolyp kesýge umtyldy. Tap osy sátte Zenovkanyń súrinip ketip, chempıondyq ataqtan aıyrylyp qalǵanyna búkil álem kýá boldy. Osy bir tartysty sátti áıgili fotograf Genrı Shvars taspalaǵan eken.
Qazirgi bessaıys sportynan Álem jáne Azııa chempıonatynda top jarǵan otandasymyz búginde Aýstralııada turady. Olımpıada chempıony atanǵannan keıin 1997 jyly jasyl qurlyq eline qonys aýdarǵan. Sondaı-aq Parygın 2004 jyly Aýstralııa quramasy sapynda Afıny Olımpıadasyna qatysyp, máre syzyǵyn nebári 27-shi bolyp kesken.
Parygınniń altyn alǵanyna 26 jylǵa jýyq ýaqyt ótse de, búginge deıin birde-bir qazaqstandyq sportshy Parygınniń jetistigin qaıtalaı almaı júr. Otandasymyzdyń altyny qazirshe sporttyń osy túrinen Olımpıadada jeńip alǵan Qazaqstannyń alǵashqy jáne ázirshe sońǵy júldesi.
