Aımaqtar • 21 Mamyr, 2020

Sýǵa shomylý maýsymy taıap qaldy

10 retkórsetildi

О́ńirlik kommýnıkasııalar qyzmetinde ótken brıfıngte Aqmola oblystyq tótenshe jaǵdaılar departamenti bastyǵynyń orynbasary, polkovnık Qanat Dospaev sýǵa shomylý maýsymyna daıyndyq jáne qaýipsizdik sharalary jóninde aıtyp berdi.

Qaýipsizdik adam ómirindegi eń mańyzdy faktordyń biri bolyp tabylady. Osy oraıda, atalmysh departament óz quzyry aıasynda óńirdiń sý aıdyndarynda eresekter men balalar ólimine jol bermeý sharalaryn qamtamasyz etedi. Aqmola oblysynyń aýmaǵynda demalatyn jáne balyq aýlaıtyn 754 sý aıdyny bar.

– Nura men Esil ózenderi eń qaýipti sý aıdyndary bolyp tabylady. Munda eki jyldyń ishinde 14 adam, onyń ishinde 5 bala sýǵa ketti. О́tken jyldyń sýǵa shomylý maýsymynda oblystyń sý aıdyndarynda barlyǵy 22 adam, onyń ishinde 7 jasóspirim qaıtys boldy. Barlyq oqıǵa qutqarý bólimsheleri joq, kúzetilmeıtin sý aıdyndarynda jáne jabdyqtalmaǵan sýǵa shomylý oryndarynda tirkeldi. Bıylǵy jyldyń 1 maýsymynda sýǵa shomylý maýsymy bastalady. Karantın aıaqtalysymen jáne jazǵy demalys bastalysymen oblys turǵyndary men meımandary dem alý úshin demalys aýmaǵyna, kempıngterge, ártúrli sý aıdyndaryna kóptep barady. Osy oraıda, sýda adam ólimine jol bermeý maqsatynda departament oblystyń jergilikti atqarýshy organdarymen birge keshendi aldyn alý sharalaryn júrgizýde. Oblystyń sý aıdyndarynda qutqarý jumysyn júrgizý úshin departamenttiń arnaıy otrıadynda 61 kásibı qutqarýshy, 4 qutqarý bólimshesi, Býrabaı, Zerendi, Qopa jáne Shýche kólderinde súńgýirler bólimderi daıyndaldy. Olardyń tehnıkasy men júzý quraldary, sý asty jabdyqtary paıdalanýǵa daıyn. Balalar jyl saıyn sýda maltýǵa úıretiledi. Bıylǵy jyly osyǵan 165 bala oqytyldy. Sý kózderinde adam óliminiń aldyn alý úshin BAQ quraldary jáne ózge de joldarmen úgit-nasıhat jumystary júrgiziledi. Sondaı-aq, kerek jerlerde «Sýda shomylýǵa bolmaıdy» degen belgiler ornatylýda. Ázirge osyndaı 160 belgi ornatyldy. Zerendi men Esil aýdandary aýmaǵynda sýǵa túsetin kommýnaldyq oryndar ashyldy. Búgingi kúni 55 qutqarýshysy bar 28 maýsymdyq qutqarý beketi quryldy. Oblystyń sý aıdyndarynda qaıǵyly oqıǵalardyń aldyn alý maqsatynda oblys ákimi «Sýǵa shomylý maýsymynda qaýipsizdikti qamtamasyz etý sharalary týraly» qaýlyny bekitti.

Sondaı-aq oblysta tótenshe jaǵdaıdyń aldyn alý jónindegi komıssııanyń eki otyrysy bolyp ótti. Mundaı otyrystar barlyq qala men aýdandarda ótkizildi. Degenmen, soǵan qaramastan, bıylǵy jyldyń ózinde eki adam sýǵa ketti. Budan shyǵatyn qorytyndy, ózen-kólderde adamdardyń ózderi de barynsha saqtyq sharalaryn saqtap, biz de osy máselelerge muqııat kóńil bólip, tııanaqty jumys isteýimiz kerek, – dep túıindegen polkovnık Qanat Dospaev sýda ózin-ózi ustaýdyń negizgi erejesin de eske saldy.

 

Sońǵy jańalyqtar

Jigittiń jaqsysy

Rýhanııat • Keshe

Uqsas jańalyqtar