Salyq kodeksine usynylatyn túzetýler qazaqstandyqtardyń ómir súrý sapasynyń álsireýine ákelip soǵady, deıdi Májilis depýtaty A.Perýashev.
Salyq kodeksine usynylatyn túzetýler qazaqstandyqtardyń ómir súrý sapasynyń álsireýine ákelip soǵady, deıdi Májilis depýtaty A.Perýashev.
Muny depýtat Májilistiń salyq salý máseleleri týraly zań jobasyn tanystyrý boıynsha ótken otyrysynda aıtty. Eskerte keteıik, Úkimettiń jeke tulǵalar páterleriniń aýmaǵy 150 sharshy metrden, jer úıleriniń kólemi 300 sharshy metrden asatyn menshikterge 3 esege deıin salyqty kóterý, «qansha lastasań, sonsha tóleısiń» degen qaǵıdamen qýaty 3-4 myń tekshe sm. kólemnen asatyn kólikterge salyq mólsherlemelerin ulǵaıtý jáne t.b. qarastyryp jatqany belgili.
«Nege siz turǵyn úıde qansha adam turatyndyǵynan góri, turǵylyqty aýdanyn ǵana esepke alyp otyrsyz? – dedi tanystyrylym barysynda Azat Perýashev Ekonomıka jáne bıýdjettik josparlaý mınıstri Erbolat Dosaevqa. – 150 sharshy metr degen 4-6 balasy bar otbasyǵa ne bolady? Qazaq otbasylarynda úsh urpaq: balalary men áke-sheshesi ǵana emes, sondaı-aq, ata-ájesi de birge tura beredi. Astana men Almatyda, oblys ortalyqtarynda týǵan-týysqandarynyń balalarynyń ne oqýǵa, ne jumys isteýge keletinderi taǵy bar. Nege osy jáıtti eskermeısizder? Búginderi kópbalalyq arqyly demografııany qoldaý kerektigin aıtyp júrmiz. Olarǵa kómektesýdiń ornyna, kerisinshe, mundaı otbasylarǵa qalaısha menshik salyǵyn 3 esege kóbeıtemiz?!»
A.Perýashev mınıstrge turǵyn úı qurylysyn damytý men ómir súrý standarttarynyń deńgeıin jaqsartý týraly Elbasynyń tapsyrmalaryn esine salyp ótti. «Siz sa-paly ómir súrýge yntalandyrýdyń ornyna kedeıshilikke ıtermelep, turǵyndarymyzdy qaıtadan «hrýshevkalarǵa» tyǵýdy usynyp otyrsyz? Turǵyn úı qurylysy, jaqsy úıge suranys – bul jumys oryndary, bul bıýdjetke salyq túsirý, bul qurylys materıaldaryn óńdirý. Sonda siz is júzinde osylardy qysqartýdy usynyp otyrǵanyńyzdy túsinesiz be?», – dedi depýtat.
Kólikke salynatyn salyqty ulǵaıtý týraly Azat Perýashev: «Bul – tikeleı Reseı avtomobılderiniń múddesin qorǵaý, biraq olardyń atmosferany lastaýy nóldiń shamasyndaǵy 3 lıtrlik «Mersedes» nemese «Toıotalarǵa» qaraǵanda kólemi shaǵyn bolǵanymen, gaz qaldyqtaryn shyǵarýy kóp», – dedi. Onyń pikirinshe, Úkimet ekologııa úshin kúres degendi jeleý etip, reseılik ónimnen góri sapaly zamanaýı kólikterdi satyp alýshylarǵa shúıligýde. «Biz onsyz da syrttan keletin kólikterge ákelim baj salyǵyn ósirdik. Al endi Reseıdiń múddesin odan ári tyqpalaı bermeı, ózimizdiń azamattarymyzdyń óz qarjylaryna alǵysy keletin tańdaý quqyqtaryn nege qorǵamaımyz», – dedi depýtat.
A.Perýashev qoǵamda keń talqylanyp júrgen kólik salyǵyn ony janar-jaǵarmaı materıaldary aksızine qosýǵa tolyq aýystyratyn tájirıbeni zertteýge shaqyrdy: «Sol kezde biz shynymen de aýany lastaıtyn shyǵyny kóp ekonomıkalyq tıimsiz qozǵaltqyshy bar avtokólik ıelerin kóp tóletýge májbúrleımiz», dedi depýtat osy oraıda.
Sáýlebek BIRJAN.
