Eskertkishtiń ornatylýyna oblystyq sottyń tóraǵasy Nurserik Sháripov bastamashy bolǵan. Úsh bıdiń qoladan quıylǵan músinin halyq sheberi Jeńis Erkinuly Almaty qalasynda tórt aıdyń ishinde jasap shyǵarypty.
«Úsh bı» músindik kompozısııasynyń ashylý saltanatyna oblys ákimi Jeńis Qasymbek qatysyp, quttyqtaý sóz sóıledi. «Bul eskertkish sot tóreliginiń nyshany retinde Qazaqstan halqy aldyndaǵy sýdıalardyń jaýapkershiligin eske salyp otyrady», dedi ol.
Qaraǵandy oblystyq sotynyń tóraǵasy eskertkishtiń sot saraıynyń arhıtektýralyq ansamblimen biriktirilip josparlanǵan atap ótti.
– Úsh uly bı tarıhymyzǵa qoǵam jáne saıası qaıratkerler retinde engen. Olar tek bitimger sýdıalar ǵana emes, handardyń keńesshileri de boldy. Bılerdiń keńesin basqardy. Olar baı ómirlik tájirıbesi bar, qazaq halqynyń tarıhyn, dástúrin biletin dana adamdar boldy. Áıgili bılerimizdiń negizgi mindeti qoǵamdaǵy turaqtylyqty saqtaý edi. Olar rıtorıka, nanym sheberligine ıe bolǵan. Biz osy kúnge deıin olardyń naqyl sózderine, ósıetterine súıenemiz, – dedi ol.
Sonymen qatar, oblystyq sottyń tóraǵasy úsh bıdiń osy ýaqytqa deıingi tanymal bolǵan obrazyn qaıtalamaýǵa tyrysqandaryn aıtady.
«Dınamıkany kórsetkimiz keldi. Bul ǵasyrlar boıy kele jatqan dástúrlerge qarap, urpaqtar kózqarastaryn qalyptastyrý úshin jasalǵan dúnıe», deıdi Nurserik Sháripov.
Eskertkishtiń ashylý saltanatyna qatysqan ardager-sýdıalar gúl shoqtaryn qoıý rásiminen keıin, oblystyq sot byltyrǵy jyldyń qarasha aıynda qonystanǵan jańa ǵımaratty aralap kórdi.
Danalyq pen ádilettiliktiń sımvoly bolýǵa qyzmet etýge tıis bul eskertkish Qaraǵandy oblysyndaǵy jeke tulǵalarǵa arnalǵan tuńǵysh músindik kompozısııa.
Qaraǵandy oblysy
