Al búgin ol oblystyń ardagerler uıynyń ókilderimen kezdesti. Aldymen aqsaqaldarǵa sálem bergeni de jas basshynyń kórgendiligin kórsetti. Oblystyq ardagerler alqasynyń tóraǵasy Eskendir Eleýsizov aqsaqal Ǵ.Nyǵymetovke ózderiniń atqaryp jatqan jumystary jaıly áńgimelep berdi. Sonyń ishinde keıbir máselelerdiń de bar ekendigi aıtyldy. Al jergilikti ólketanýshy, ǵalym Zarqyn Taıshybaı Rýhanı jańǵyrý baǵdarlamasynyń oryndalý barysyn, osy tarapta atqarylyp jatqan jumystar týraly keńinen tolǵady. Oblystyq «Soltústik Qazaqstan» gazetiniń basshysy, belgili qoǵam qaıratkeri Jarasbaı Súleımenov anomastıkalyq máseleler boıynsha óziniń oıyn ortaǵa saldy. Sonyń ishinde Petropavldyń qazaqsha ataýynyń qaıtarylýy týraly da áńgime qozǵady.
Oblystaǵy belgili aqsaqaldar, buryn basshylyq qyzmetterde bolǵan Qudaıbergen Qalıev pen Amangeldi Balmuqanov jáne basqalar eldiń tarıhyna tereńirek boılap, osy óńirden shyqqan ataqty tulǵalar týraly aıtty. Sonyń ishinde Mahtaı Saǵdıevke, Kákimbek Salyqovqa jáne t.b basqalaryna kóshe atynyń berilmegendigine ókinish aıtyldy. Otyrysta oblystyq onomastıka, máslıhat jappaı qoldasa da áıgili jerlesimiz Sábıt Muqanovtyń atyna aýdan atynyń áli kúnge berilmeı turǵandyǵyna qynjylys bildirildi.
Ǵanı Nyǵymetov atalǵan máselelerdiń bárin yjdahatpen tyńdap, sheshýge bolatyndaryn dereý qolǵa alatyndyǵyna ýáde berdi.
