Aımaqtar • 23 Mamyr, 2020

SQO-da patrýlder qutqarýshynyń da qyzmetin atqaryp júr

11 ret kórsetildi

О́tken jyly Ishki ister mınıstri, polısııa general-leıtenanty Erlan Turǵymbaevtyń tapsyrmasyna sáıkes Soltústik Qazaqstannyń patrýldik polısııa ekıpajdary qutqarý quraldarymen jabdyqtalǵan bolatyn. Qazir polıseılerde tótenshe jaǵdaı kezinde paıdalanylatyn 20 qutqarý jıyntyǵy bar. Bul jıyntyq qutqarý jıleti, dóńgelek, arqan, órt jamylǵysy, metall kesetin ara men qaıshy, aýyr balǵa, sham jáne taǵy basqa turady.

Osyndaı jıyntyqtar adam ómirine ottan, sýdan, jol apatynan qaýip tóngen kezderde qutqarýǵa kómek beredi. Máselen, jol apatynan aýdarylǵan mashınanyń esigi ashylmaı qalǵanda ishindegi adamdy qutqarý úshin qatty shynyny syndyratyn aýyr balǵanyń  qajettiligi óte zor. Sondaı-aq sýǵa batyp bara jatqan adamdy qutqarýda sýǵa batpaıtyn dóńgelektiń de paıdasy mol.

О́tken jyly Soltústik Qazaqstan oblysynyń polıseıleri tótenshe jaǵdaıǵa túsip qalǵan ondaǵan adamǵa qol ushyn sozdy. Tártip saqshylary kóp jaǵdaıda oqıǵa ornyna alǵashqylardyń biri bolyp barady, sondyqtan olarǵa órt kezinde, sýda jáne basqa da tótenshe jaǵdaılar kezinde kómek kórsetýge týra keledi. Máselen, byltyrǵy tamyzda patrýldik polısııa qyzmetkerleri jertólege túsip, es-tússiz jatqan Petropavl qalasynyń eki turǵynyn alyp shyǵý kezinde arqan men shamnyń paıdasy zor boldy.

Bıyl Polısııa departamenti patrýldik polısııanyń barlyq ekıpajdaryn qosymsha qutqarý quraldarymen jabdyqtaýdy josparlap otyr. «Atalǵan quraldar polısııa qyzmetkerleriniń jumysyna eleýli septigin tıgizedi. Qyzmetkerler jolda júrgizýshilerge kómektesip turady, kólikterdiń órtenip jatqan jaǵdaılary da boldy. Sondaı-aq ınspektorlar jol apaty kezinde adam ómirlerin de qutqardy. Bundaı jaǵdaılarda qutqarý jıyntyqtary asa qajet», - dep atap ótti Polısııa departamenti patrýldik polısııa batalonynyń komandıri polısııa podpolkovnıgi Erlan Mádıev.

PETROPAVL

Sońǵy jańalyqtar

Rýbl baǵamy quldyrady

Ekonomıka • Keshe

Uqsas jańalyqtar