Álem • 25 Mamyr, 2020

Pákistanda ushaq qulady

38 ret kórsetildi

Pákistanda ushaq apatqa ushyrap, 97 adam qaza tapty. Karachıdegi áýejaıǵa qonar tusta qulaǵan áýe kemesi «Pákistan halyqaralyq áýe joly» kompanııasyna tıesili.

Ushaq Lahordan ushyp shy­ǵyp, Karachıge qonar tusta áýe­jaı mańyndaǵy úılerdiń biri­ne qulaǵan. Pákistan Densaýlyq saq­taý mınıstri baspasóz hatshy­synyń málimdeýinshe, apattan eki adam aman qalǵan.

Qazirgi tańda qaza bolǵan­dar­dyń denesi Karachıdegi eń úlken memlekettik aýrýhana – Jinnah medısınalyq ortalyǵy men Azamattyq aýrýhanasyna jetkizilgen. Arnaıy komıssııa qaza tapqandardyń kim ekenin zerttep jatyr. Ázirge 19 adam ǵana anyqtalǵan.

Pákistandyq buqaralyq aqparat quraldarynyń habarlaýynsha, ushaq bortynda 99 jolaýshy jáne 8 ekıpaj múshesi bolǵan. Qaza tapqandar arasynda qıraǵan úılerdiń turǵyndary da bar. Ázirge el bıligi qaza tapqandar sanyn naqty aıta alar emes. О́ıtkeni úıindi astynda qansha adam jatqany belgisiz.

Aldyn ala derek boıynsha, PK-8303 baǵytyndaǵy Airbus A320 ushaǵy tehnıkalyq apatqa baılanysty qulaǵan. Pákistan telearnalary aqyrǵy sátte  bolǵan pılot pen áýe dıspetcheri arasyndaǵy áńgimeni jarııalady. Onda ushqyshtyń qozǵaltqysh isten shyqqanyn aıtqany esti­ledi. Áýe dıspetcheriniń áýe ke­mesin dońǵalaqsyz qondyrý yqtımaldylyǵyn suraǵan saýalyna pılot jaýap bermegen kórinedi. Keıinnen baılanys úzilip ketipti.

«Ushaǵymyz Lahordan Kara­­chıge kelip qonýy tıis edi. Pı­lot sońǵy sózinde qonar kezde teh­nıkalyq másele týyndap, áýe kemesin qaıta kókke kóte­rip, bir aınalyp kelýge she­shim qabyldady», deıdi «Pákis­tan halyqaralyq áýe joly» kompanııasynyń basshysy Ar­shad Malık.

Áleýmettik jelilerde tara­ǵan vıdeolarda ushaqtyń turǵyn úılerdi japyra qulaǵany kóri­nedi. Áýe kemesiniń keı bólikteri kóshelerde shashylyp jatyr. Sondaı-aq kóshede birneshe kólik órtengen.

Apattan aman qalǵan Muham­med Zýbaır jergilikti telear­na­larǵa suhbat berip, oqıǵanyń jaı-japsaryn habarlady. Onyń aıtýynsha, áýe kemesi bir márte qonýǵa talpynǵan. Keıinnen kók­ke kóterilip, 10-15 mınýttan keıin qulaǵan. Perishtesi qaq­qan shyǵar, Zýbaırǵa asa qatty zaqym kelmepti.

«Ushaq qulaıdy dep eshkim oılaǵan joq. Ol baıaý qalyqtap kele jatqan edi. Jerge soǵylǵan kezde esimdi joǵalttym. Esim­di jıǵanda aınaladan yńyr­syǵan, aıqaılaǵan daýystar estidim. Úlkender de, balalar da kómek surap jatty. Jan-jaǵym otqa oranǵan. Qaýipsizdik beldigin sheship alǵa umtyldym. Alystan jaryq kórindi. Soǵan qaraı umtyla berdim. Ushaqtan shyǵý úshin úsh metr bıikten sekirýge týra keldi», deıdi ol.

Pákistan koronavırýs pandemııasyna baılanysty toqtap qalǵan eldegi áýe qatynasyn taıaýda ǵana iske qosqan-dy. Jalpy, keıingi jyldary osy elde ushaqtar jıi qulap júr. Máselen, 2010 jyly Airblue kom­panııasynyń laıneri Islamabad mańynda qulap, borttaǵy 152 adam túgeldeı mert boldy.

2012 jyly Ravalpındı qa­lasy mańynda Bhoja Air kom­panııasynyń «Boıng-737» áýe kemesi kókke kóterile almaı, 127 adam qaza tapty. 2016 jyly «Pákistan halyqaralyq áýe jo­ly» kompanııasynyń ushaǵy áýe­de janyp ketip, 47 adam baqıǵa attandy.

Sońǵy jańalyqtar

Almaty mańynda jer silkindi

Aımaqtar • Keshe

Uqsas jańalyqtar